തേക്കടിയില്‍ ബോട്ട് സവാരി പുനരാരംഭിച്ചു

തേക്കടി: ബോട്ടപകടത്തെ തുടര്‍ന്ന് തേക്കടി തടാകത്തില്‍ കഴിഞ്ഞ മൂന്നര മാസമായി നിര്‍ത്തിവെച്ചിരുന്ന ബോട്ട് സവാരി പുനരാരംഭിച്ചു. വനം വകുപ്പിന്റെ പെരിയാര്‍, വനജ്യോല്‍സ്‌ന എന്നീ ബോട്ടുകളാണ് വെള്ളിയാഴ്ച രാവിലെ സര്‍വീസ് തുടങ്ങിയത്. കെടിഡിസിയുടെ മൂന്ന് ബോട്ടുകളും സര്‍വീസ് തുടങ്ങിയിട്ടുണ്ട്.

കഴിഞ്ഞ വര്‍ഷം സെപ്റ്റംബര്‍ 30ന് ബോട്ടു ദുരന്തത്തെ തുടര്‍ന്നാണ് ബോട്ടിങ് നിര്‍ത്തി വച്ചത്. വനം വകുപ്പിന്റേയും കെടിഡിസിയുടേയും ബോട്ടുകള്‍ക്ക് ചീഫ് ഇന്‍സ്‌പെക്ടര്‍ ഓഫ് ബോട്ട്്‌സ് ഫിറ്റ്‌നസ് സര്‍ട്ടിഫിക്കറ്റ് ലഭിച്ചതിനെ തുടര്‍ന്നാണ് ബോട്ടിങ് പുനരാരംഭിച്ചത്.

കേന്ദ്ര വനം-പരിസ്ഥിതി മന്ത്രാലയത്തിന്റേയും സംസ്ഥാന ജലഗതാഗത വകുപ്പിന്റേയും മാനദണ്ഡങ്ങള്‍ക്ക് അനുസൃതമായി ബോട്ടുകളില്‍ മാറ്റം വരുത്തിയിട്ടുണ്ട്. ടിക്കറ്റ് കരിഞ്ചന്ത തടയുന്നതിന്റെ ഭാഗമായി തേക്കടി വന്യമൃഗ സങ്കേതത്തിലേക്ക് പ്രവേശന ടിക്കറ്റ് ഉള്ളവര്‍ക്കു മാത്രമേ ഇനി മുതല്‍ ബോട്ടിങ്ങിന് ടിക്കറ്റ് നല്‍കേണ്ടതുള്ളൂവെന്ന് വനം വകുപ്പ് തീരുമാനിച്ചിട്ടുണ്ട്.

യാത്രക്കാരുടെ പൂര്‍ണമേല്‍വിലാസം കംപ്യൂട്ടറില്‍ രേഖപ്പെടുത്തിയ ശേഷമായിരിക്കും ബോട്ടിങ്ങിനുള്ള ടിക്കറ്റ് നല്‍കുക. ബോട്ടിങ് യാര്‍ഡില്‍ യാത്രക്കാരുടെ തിരക്ക് നിയന്ത്രിക്കാനും നടപടി സ്വീകരിച്ചിട്ടുണ്ട്.