ഗാന്ധി മേല്‍വിലാസം തുണയായി: രാഹുല്‍

ഭോപ്പാല്‍: ഗാന്ധി കുടുംബാംഗമെന്ന മേല്‍വിലാസമാണ് രാഷ്ട്രീയത്തില്‍ ഇത്രയേറെ ശ്രദ്ധ നേടാനും വളരാനും തനിക്ക് സഹായകമായതെന്ന് എഐസിസി ജനറല്‍ സെക്രട്ടറി രാഹുല്‍ ഗാന്ധി.

ജബല്‍പ്പൂരില്‍ സ്‌കൂള്‍ വിദ്യാര്‍ത്ഥിനികളുമായി നടത്തിയ സംഭാഷണത്തിനിടെയാണ് തന്റെ ഗാന്ധി മേല്‍വിലാസത്തിന്റെ ഗുണങ്ങളെക്കുറിച്ച് രാഹുല്‍ സംസാരിച്ചത്.

ഇന്ത്യയില്‍ രാഷ്ട്രീയ പ്രവേശനം സാധ്യമാകുന്നത് സാധാരണ നാല് വഴികളിലൂടെയാണ്. ഒന്നുകില്‍ നമുക്ക് പണവും അധികാരവും ഉണ്ടായിരിക്കണം, അല്ലെങ്കില്‍ നമ്മുടെ ഒരു ബന്ധു രാഷ്ട്രീയത്തില്‍ പ്രബലനായിരിക്കണം, ഈ വഴിയിലൂടെ രാഷ്ട്രീയത്തില്‍ പ്രവേശിക്കുന്നതിന് ഞാന്‍ ഒരു ഉദാഹരണമാണ്.

രാഷ്ട്രീയത്തിലുള്ളവരുമായി നല്ല സൗഹൃദവും അവരുടെ അധികാരം ഉപയോഗപ്പെടുത്തുനുമുള്ള കഴിവുമുണ്ടെങ്കില്‍ രാഷ്ട്രീയത്തില്‍ പ്രവേശിക്കാമെന്നതാണ് മൂന്നാമത്തെ വഴി.

നാലാമത്തേതാകട്ടെ സാധാരണക്കാര്‍ക്ക് വേണ്ടി താഴേത്തട്ടില്‍ നിന്നും പ്രവര്‍ത്തിച്ച് അവര്‍ക്കുവേണ്ടി സമരരംഗത്തിറങ്ങി രാഷ്ട്രീയത്തിലേയ്ക്ക് വളരുകയെന്നതാണ്. നാലു വഴികളില്‍ ഏറ്റവും ബുദ്ധിമുട്ടുള്ളതും പരിശ്രമം വേണ്ടതുമായ വഴി ഇതുതന്നെയാണ്- രാഹുല്‍ വിശദീകരിച്ചു.

ഉള്‍പ്പാര്‍ട്ടി ജനാധിപത്യത്തെക്കുറിച്ചുള്ള ചോദ്യത്തിന് ലോകത്തെ ഏറ്റവും വലിയ ജനാധിപത്യരാജ്യത്ത് പൂര്‍ണമായ ജനാധിപത്യസ്വഭാവമുള്ള ഒരു ചെറുപാര്‍ട്ടിപോലുമില്ലെന്നായിരുന്നു രാഹുലിന്റെ മറുപടി.

ചെറു സംസ്ഥാനങ്ങള്‍ക്കുവേണ്ടിയുള്ള മുറവിളികളെക്കുറിച്ച് ചോദിച്ചപ്പോള്‍ വികസനവും സമ്പത്തും തങ്ങളിലേയ്ക്ക് വേഗത്തിലെത്താന്‍ ചെറിയ സംസ്ഥാനങ്ങളാണ് ഉപകരിക്കുകയെന്നാണ് ജനങ്ങള്‍ വിശ്വസിക്കുന്നതെന്നായിരുന്നു യുവനേതാവിന്റെ വിശദീകരണം.