താജില് കയറിയത് ഇന്ത്യന് തീവ്രവാദികള്: കസബ്
മുംബൈ ഭീകരാക്രമണ കേസില് വിചാരണ നടത്തുന്ന പ്രത്യേക കോടതിക്കു മുമ്പാകെയാണ് കസബ് ഇക്കാര്യം വ്യക്തമാക്കിയത്.
താജ് ഹോട്ടലില് കടന്ന ഒരു ഭീകരന് കശ്മീരിയും മറ്റൊരാള് ഗുജറാത്തിയും അബു ഇസ്മായില് എന്ന മൂന്നാമന് മുംബൈ സ്വദേശിയുമായിരുന്നുവെന്ന് കസബ് പറഞ്ഞു. എന്നാല്, നാലാമത്തെ ആളെ കുറിച്ച് കസബ് വിശദവിവരങ്ങള് നല്കിയില്ല.
ദൃക്സാക്ഷികള് തിരിച്ചറിഞ്ഞ, ഏറ്റുമുട്ടലില് കൊല്ലപ്പെട്ട ഭീകരരെ കുറിച്ച് എന്തെങ്കിലും പറയാനുണ്ടോ എന്ന ജഡ്ജിയുടെ ചോദ്യത്തിനുള്ള മറുപടിയായാണ് കസബ് ഭീകരര് ഇന്ത്യക്കാരാണെന്ന് പറഞ്ഞത്.
ഇസ്മായില് മുംബൈ സ്വദേശിയാണെന്ന് എങ്ങനെ മനസ്സിലായി എന്ന ചോദ്യത്തോട് 'മുഖം കണ്ടാല് അറിയാം" എന്നായിരുന്നു കസബിന്റെ പ്രതികരണം.
കസബ് പരസ്പര വിരുദ്ധമായ പ്രസ്താവനകളാണ് കോടതിക്കു മുമ്പാകെ നടത്തുന്നത്. ആദ്യം താനും അബു ഇസ്മായിലും ചേര്ന്ന് ഛത്രപതി ശിവജി ടെര്മിനസില് വെടിവയ്പ് നടത്തിയെന്ന് കസബ് കുറ്റസമ്മതം നടത്തിയിരുന്നു.
എന്നാല്, പിന്നീട് താന് ഭീകരാക്രമണത്തില് ഉള്പ്പെട്ടിട്ടില്ല എന്നും പൊലീസിന്റെ പീഡനം കാരണമാണ് കുറ്റസമ്മതം നടത്തിയതെന്നും കസബ് മൊഴി മാറ്റിയിരുന്നു.