ആസ്ത്രേലിയയില്‍ നടക്കുന്നത് വംശീയാക്രമണം

മെല്‍ബണ്‍: ആസ്ത്രേലിയയില്‍ ഇന്ത്യന്‍ വംശജര്‍ക്കു നേരെയുണ്ടാകുന്നത് വംശീയാക്രമണങ്ങള്‍ തന്നെയാണെന്ന് ആസ്ത്രേലിയയിലെ മുന്‍ സൈനിക മേധാവി ജനറല്‍ പീറ്റര്‍ കോസ്ഗ്രോവ് പറഞ്ഞു.

ഇന്ത്യക്കാര്‍ ആസ്ത്രേലിയയില്‍ നേരിടുന്നത് ആക്രമണങ്ങള്‍ വംശീയ സ്വഭാവമുള്ളവയല്ലെന്ന സര്‍ക്കാര്‍ അധികൃതരുടെ വാദങ്ങള്‍ അംഗീകരിക്കാനാവില്ലെന്നും അദ്ദേഹം വ്യക്തമാക്കി.

ഈ ആക്രമണങ്ങള്‍ വംശീയമായ കാരണങ്ങള്‍ കൊണ്ടാണെന്നു വിശ്വസിക്കാത്തവര്‍ക്കു ഭ്രാന്താണെന്നു സംശയിക്കേണ്ടിയിരിക്കുന്നാണ് ദ് ഏജ് ദിനപ്പത്രത്തിനു നല്‍കിയ അഭിമുഖത്തില്‍ കോസ്ഗ്രോവ് പറഞ്ഞത്.

ഇന്ത്യന്‍ വംശജനായ ടാക്സി ഡ്രൈവര്‍ക്കു കുത്തേറ്റത് ഉള്‍പ്പെടെ ഈ മാസം ഇന്ത്യക്കാര്‍ക്കു നേരെ മൂന്ന് ആക്രമണങ്ങള്‍ ആണു റിപ്പോര്‍ട്ടു ചെയ്യപ്പെട്ടത്. ഇത്തരം ആക്രമണങ്ങളില്‍ ആശങ്ക വേണ്ടെന്നു പറഞ്ഞുകൊണ്ടിരിക്കുന്നതിന് പകരം സംഭവത്തെ കൂടുതല്‍ ഗൌരവപരമായി കാണണമെന്ന് അദ്ദേഹം ആവശ്യപ്പെട്ടു

കഴിഞ്ഞ 18 മാസങ്ങള്‍ക്കിടെ ഓസ്ട്രേലിയയില്‍ ഇന്ത്യക്കാര്‍ക്കു നേരെ നടന്ന ആക്രമണങ്ങള്‍ ഇരു രാജ്യങ്ങളുടെയും നയതന്ത്രബന്ധത്തെ മോശമായി ബാധിച്ചിട്ടുണ്ടെന്നും അദ്ദേഹം പറഞ്ഞു.