ദില്ലിയില്‍ കനത്ത മൂടല്‍മഞ്ഞ്

ദില്ലി: കഴിഞ്ഞ ഏഴുവര്‍ഷത്തിനിടയിലെ ഏറ്റവും കനത്ത മൂടല്‍മഞ്ഞിനുള്ളില്‍ അകപ്പെട്ട് ദില്ലി നിവാസികള്‍ നട്ടംതിരിയുന്നു. വ്യോമ, റെയില്‍ ഗതാഗതത്തെ മൂടല്‍മഞ്ഞ് കാര്യമായി ബാധിച്ചിട്ടുണ്ട്. 10 രാജ്യാന്തര വിമാനങ്ങള്‍ അടക്കം 30 ഓളം വിമാനങ്ങള്‍ വൈകിയാണ് സര്‍വീസ് നടത്തുന്നത്. 15 ആഭ്യന്തര വിമാനങ്ങള്‍ റദ്ദാക്കി. പല വിമാനങ്ങളും വഴിതിരിച്ചു വിട്ടതായി അധികൃതര്‍ അറിയിച്ചു. റോഡ് ഗതാഗതവും താറുമാറായിട്ടുണ്ട്. മൂടല്‍മഞ്ഞ് മൂലം കാഴ്ചാപരിധി പലയിടത്തും അമ്പത് മീറ്ററിലും താഴെയാണ്.

കഴിഞ്ഞദിവസം രാത്രിയിലാണ് മൂടല്‍ മഞ്ഞു കനത്തു തുടങ്ങിയത്. രാത്രിയില്‍ കാഴ്ചാപരിധിപൂജ്യം ആയി താഴ്ന്നിരുന്നു. ഇപ്പോള്‍ 150 മീറ്ററാണ് ഇന്ദിരാഗാന്ധി രാജ്യാന്തര വിമാനത്താവളത്തിലെ റണ്‍വേയിലെ കാഴ്ചാപരിധി. മൂടല്‍മഞ്ഞ് തീവണ്ടി സര്‍വീസിനെയും ബാധിച്ചു. 15 തീവണ്ടികള്‍ റദ്ദാക്കി.

കനത്ത മൂടല്‍ മഞ്ഞിന്റെ പശ്ചാത്തലത്തില്‍ ഈ മാസം 31 വരെ ചില ഉത്തരേന്ത്യന്‍ സംസ്ഥാനങ്ങളില്‍ രാത്രികാലങ്ങളിലും പുലര്‍ച്ചെയുമുള്ള തീവണ്ടി സര്‍വീസുകള്‍ റദ്ദാക്കിയിട്ടുണ്ട്. കൊടും ശൈത്യത്തെ തുടര്‍ന്ന് ഉത്തരേന്ത്യയില്‍ 450ലധികം പേര്‍ കൊല്ലപ്പെട്ടതായാണ് റിപ്പോര്‍ട്ടുകള്‍.