പ്രഭാകരന്‍ ജീവിച്ചിരിപ്പുണ്ട്: എല്‍ടിടിഇ

ചെന്നൈ: എല്‍ടിടിഇ നേതാവ് വേലുപ്പിള്ള പ്രഭാകരന്‍ കൊല്ലപ്പെട്ടിട്ടില്ലെന്നും അദ്ദേഹം സുരക്ഷിതനായി ജീവിച്ചിരിപ്പുണ്ടെന്നും വീണ്ടും അവകാശവാദം.

എല്‍ടിടിഇപ്രസ് ഡോട്ട് കോം എന്ന പുതിയ വെബ് സൈറ്റിലാണ് പ്രഭാകരന്‍ ജിവിച്ചിരിപ്പുണ്ടെന്ന് എല്‍ടിടിഇ അവകാശപ്പെടുന്നത്. എല്‍ടിടിയുടെ ഔദ്യോകിക വെബ് സൈറ്റെന്നാണ് സൈറ്റില്‍ വ്യക്തമാക്കിയിരിക്കുന്നത്.

പ്രഭാകരനെ കൊലപ്പെടുത്തിയെന്ന ശ്രീലങ്കന്‍ സര്‍ക്കാറിന്റെ വാദം അടിസ്ഥാനരഹിതമാണെന്ന മാരന്‍ എന്ന എല്‍ടിടിഇ വക്താവ് സൈറ്റില്‍ പറയുന്നു.

മാത്രമല്ല പ്രഭാകരന്‍ ഒരുനാള്‍ ജനങ്ങള്‍ക്ക് മുന്നിലെത്തുമെന്നും മാരന്‍ എല്‍ടിടിഇ പ്രവര്‍ത്തകര്‍ക്ക് ഉറപ്പ് നല്‍കുന്നുണ്ട്.

ഇപ്പോഴത്തെ അവസ്ഥയില്‍ തല്‍ക്കാലം മാറിനില്‍ക്കുകയാണെങ്കിലും നമ്മുടെ നേതാവ് സ്വാതന്ത്ര്യ സമരത്തിന്റെ അടുത്ത തലം എങ്ങനെയായിരിക്കണമെന്ന് പദ്ധതിയിടുകയാണ്. അദ്ദേഹത്തിന്റെ നേതൃത്വത്തില്‍ത്തന്നെ നമ്മള്‍ സമരത്തിന്റെ അടുത്ത ഘട്ടത്തിലേയ്ക്ക് കടക്കും- വക്താവ് പറയുന്നു.

പ്രഭാകരനെപ്പോലെ കൊല്ലപ്പെട്ടുവെന്ന് കരുതുന്ന എല്‍ടിടിഇ ഇന്റലിജന്‍സ് നേതാവ് പൊട്ടു അമ്മനും ജീവിച്ചിരിപ്പുണ്ടെന്നാണ് സൈറ്റില്‍ പറയുന്നത്.

ഒപ്പം തന്നെ പ്രഭാകരന്റെ ഭാര്യ മതിവദനി, മകന്‍ ബാലചന്ദ്രന്‍, മകള്‍ ദ്വാരക എന്നിവരും സുരക്ഷിതരാണെന്ന് എല്‍ടിടിഇ വക്താവ് അവകാശപ്പെടുന്നുണ്ട്.

പ്രഭാകരന്‍ കൊല്ലപ്പെട്ടുവെന്ന് വാര്‍ത്തകള്‍ വന്നശേഷം പ്രഭാകരന്റേതാണെന്ന് പറഞ്ഞ് പ്രദര്‍ശിച്ചിപ്പ മൃതദേഹത്തിന്റെ കാര്യങ്ങള്‍ രാജപക്‌സെയും ശരത് ഫൊന്‍സെകയും ചേര്‍ന്നു നടത്തിയ സങ്കേതിക നാടകമാണെന്നും ആരോപിക്കുന്നുണ്ട്.

ഇത് രണ്ടാം തവണയാണ് എല്‍ടിടിഇ പ്രഭാകരന്‍ മരിച്ചിട്ടില്ലെന്ന് അവകാശപ്പെട്ടുകൊണ്ട് രംഗത്തെത്തുന്നത്.