റിമോര്‍ട്ട് കണ്‍ട്രോള്‍ എന്റെ കയ്യില്‍: താക്കറെ

മുംബൈ: പ്രായം കൂടുന്നത് തന്റെ 'റിമോട്ട് കണ്ട്രോള്‍" രാഷ്ട്രീയത്തെ ബാധിക്കില്ലെന്ന് ശനിയാഴ്ച 84 തികഞ്ഞ ശിവസേന തലവന്‍ ബാല്‍ താക്കറെ.

പാര്‍ട്ടി മുഖപത്രമായ സാമ്നയില്‍ എഴുതിയ ലേഖനത്തിലാണ് താക്കറെ രാഷ്ട്രീയത്തിന്റെ റിമോര്‍ട്ട് കണ്‍ട്രോള്‍ തന്റെ കയ്യില്‍ത്തന്നെയാണെന്ന് പറയുന്നത്. ശിവസേനയുടെ നിയന്ത്രണം തുടരുമെന്നും അദ്ദേഹം വ്യക്തമാക്കി.

പാര്‍ട്ടി അണികള്‍ക്കുള്ള പിറന്നാള്‍ സന്ദേശമായി താക്കറെ എഴുതിയ ലേഖനത്തില്‍ താന്‍ 45 വര്‍ഷം മുമ്പ് രൂപീകരിച്ച പാര്‍ട്ടി ദില്ലിയിലെ അധികാര കേന്ദ്രത്തില്‍ വരെ എത്തിയതില്‍ അഭിമാനമുണ്ടെന്ന് താക്കറെ പറയുന്നു. മറാത്തവാദമാണ് പാര്‍ട്ടിയുടെ ശക്തിയെന്നും അത് എന്നും പാര്‍ട്ടിക്കൊപ്പം ഉണ്ടാവുമെന്നും താക്കറെ വ്യക്തമാക്കിയിട്ടുണ്ട്.

ആശുപത്രിയില്‍ നിന്ന് തിരിച്ചെത്തിയ തനിക്ക് ആരോഗ്യപരമായ കാരണങ്ങളാല്‍ 'മതോശ്രീ"യില്‍ പാര്‍ട്ടി അണികളെ അഭിസംബോധന ചെയ്യാനാവില്ല എന്നും തനിക്ക് പകരം ഉദ്ദവ് എത്തുമെന്നും താക്കറെ പറയന്നു.

താക്കറെയുടെ ബാന്ദ്രയിലുള്ള വസതിയാണ് 'മതോശ്രീ". എല്ലാവര്‍ഷവും അദ്ദേഹത്തിന്റെ ജന്മദിനത്തില്‍ ആയിരക്കണക്കിന് ആളുകള്‍ ആശംസകള്‍ അറിയിക്കാനായി ഇവിടെ എത്തിച്ചേരാറുണ്ട്.

അഞ്ച് വര്‍ഷം മുമ്പാണ് ആരോഗ്യപരമായ കാരണങ്ങളാല്‍ താക്കറെ സജീവ രാഷ്ട്രീയത്തില്‍ നിന്ന് വിരമിച്ചത്. താക്കറെയുടെ മകന്‍ ഉദ്ദവ് താക്കറെയാണ് ഇപ്പോള്‍ ശിവസേനയുടെ എക്സിക്യൂട്ടീവ് പ്രസിഡന്റ്.