ആര്‍എസ്എസിന്റെ പാവയാകില്ല ഗഡ്കരി

ദില്ലി: ആര്‍എസ്എസ്സിന്റെ കളിപ്പാവയായി താന്‍ പ്രവര്‍ത്തിക്കില്ലെന്ന് ബിജെപിയുടെ പുതിയ അധ്യക്ഷന്‍ നിതിന്‍ ഗഡ്കരി.

ബിജെപിയുടെ ആഭ്യന്തര കലഹം പരിഹരിക്കാന്‍ ആര്‍എസ്എസ് നിര്‍ദേശത്തെത്തുടര്‍ന്ന് മഹരാഷ്ട്ര ബിജെപി അധ്യക്ഷസ്ഥാനത്തുനിന്ന് ദേശീയ അധ്യക്ഷസ്ഥാനത്തേക്ക് എത്തിയെന്നു അറിയപ്പെടുന്ന നിതിന്‍ ഗഡ്കരി, സ്ഥാനലബ്ധിക്ക് ഒരു മാസത്തിനുശേഷമാണ് മനസ്സ് തുറക്കുന്നത്.

മറ്റാരുടെയുമോ നാമനിര്‍ദേശമനുസരിച്ച് അധികാരത്തിലെത്തിയ ആളല്ല ഞാന്‍ ആരുടെയും കളിപ്പാവയായി പ്രവര്‍ത്തിക്കുകയില്ല. ബിജെപിയെ നിയന്ത്രിക്കുന്നത് ആര്‍എസ്എസ്സാണെന്നത് തെറ്റിദ്ധാരണയാണ്. ബിജെപി അധ്യക്ഷന്‍ എന്ന നിലയിലുള്ള പ്രധാനപ്പെട്ട അജന്‍ഡ വികസനമാണ്. ഹിന്ദുത്വത്തിന് രണ്ടാംസ്ഥാനം മാത്രമാണുള്ളത്- ഒരു ചാനലിനു നല്കിയ അഭിമുഖത്തില്‍ അദ്ദേഹം വെളിപ്പെടുത്തി.

കഴിഞ്ഞ നാലു വര്‍ഷമായി ബിജെപിയുടെ മഹാരാഷ്ട്ര അധ്യക്ഷന്‍ എന്ന നിലയില്‍ ആര്‍എസ്എസ് എന്റെ ജീവിതത്തിന്‍െ ഭാഗമാണ്. എന്നാല്‍ ആര്‍എസ്എസ് നേതാക്കള്‍ എന്നെ ഒരിക്കലും നിയന്ത്രിച്ചിട്ടില്ല. അവര്‍ എനിക്ക് ഒരു നിര്‍ദേശവും തന്നിട്ടില്ല. ഇപ്പോള്‍ ബിജെപി അധ്യക്ഷന്‍ എന്ന നിലയിലും സ്വന്തം തീരുമാനങ്ങളാണ് ഞാനെടുക്കുന്നത്.

മുതിര്‍ന്ന നേതാവ് എല്‍.കെ അദ്വാനിയും ബി.ജെ.പി.യുടെ സ്ഥാനമൊഴിഞ്ഞ അധ്യക്ഷന്‍ രാജ്‌നാഥ് സിങ്ങുമാണ് അധ്യക്ഷപദവിയിലേക്ക് തന്റെ പേര് നിര്‍ദേശിച്ചതെന്നും ഗഡ്കരി പറഞ്ഞു.