ടാറ്റയുടെ അണക്കെട്ട് സര്‍ക്കാര്‍ ഭൂമിയില്‍

ഇടുക്കി: മൂന്നാറില്‍ ടാറ്റ കന്പനി അനധികൃതമായി നിര്‍മ്മിച്ചിരിക്കുന്ന അണക്കെട്ട് സര്‍ക്കാര്‍ വക വനഭൂമിയിലാണെന്ന്‌ ജില്ലാ കലക്‌ടറുടെ റിപ്പോര്‍ട്ട്‌.

റിപ്പോര്‍ട്ട്‌ സര്‍ക്കാരിന്‌ കൈമാറി. അണക്കെട്ട് നിര്‍മ്മിച്ചിരിക്കുന്നത്‌ പാരിസ്‌ഥിതിക ദുര്‍ബല പ്രദേശത്താണ്. ഇത് ചെങ്കുളം ജലവൈദ്യൂത പദ്ധതിയെ ദോഷമായി ബാധിക്കും- റിപ്പോര്‍ട്ടില്‍ വ്യക്‌തമാക്കുന്നു.

കല്ലാര്‍പുഴയുടെ ഉത്ഭവ സ്‌ഥാനത്ത്‌ ടാറ്റ അണക്കെട്ട് നിര്‍മ്മിച്ചിരിക്കുന്ന വിവരം മാധ്യമങ്ങളാണ്‌ പുറത്തുകൊണ്ടുവന്നത്‌.

ഇതേ തുടര്‍ന്ന്‌ റവന്യൂമന്ത്രി കെ.പി രാജേന്ദ്രന്‍ അന്വേഷണത്തിന്‌ ഉത്തരവിടുകയായിരുന്നു. ഏറെ മരങ്ങള്‍ വെട്ടിമാറ്റിയാണ് അണക്കെട്ട് നിര്‍മ്മാണം നടക്കുന്നത്. അണക്കെട്ടിന്റെ കോണ്‍ക്രീറ്റ് ജോലികളൊക്കെ പൂര്‍ത്തിയായിട്ടുണ്ട്.