ഹനീഫയുടെ കബറടക്കം കൊച്ചിയില്‍

കൊച്ചി: കഴിഞ്ഞ ദിവസം അന്തരിച്ച പ്രശസ്ത ചലച്ചിത്രകാരന്‍ കൊച്ചിന്‍ ഹനീഫയുടെ കബറടക്കം ബുധനാഴ്ച വൈകുന്നേരം അഞ്ചിന് നടക്കും.

കൊച്ചി സെന്‍ട്രല്‍ ജുമാ മസ്ജിദില്‍ ആണ് ആണ് കബറടക്കുക. ഉച്ചയോടെ കൊച്ചിയിലെത്തിക്കുന്ന മൃതദേഹം വസതിയായ എബി മന്‍സിലില്‍ കുടുംബാംഗങ്ങള്‍ക്കും ബന്ധുക്കള്‍ക്കും ആദരാഞ്ജലികള്‍ അര്‍പ്പിക്കാന്‍ വെയ്ക്കും.

അതിന് ശേഷം ഉച്ചയ്ക്ക് 2 മുതല്‍ 4 വരെ കൊച്ചി അംബേദ്കര്‍ സ്‌റ്റേഡിയത്തില്‍ പൊതുദര്‍ശനത്തിനു വെയ്ക്കും. നാലുമണിയോടെ മയ്യത്ത് നമസ്‌ക്കാരം ആരംഭിച്ച് അഞ്ചുമണിയോടെ കബറടക്കും. സെന്‍ട്രല്‍ ജുമാ മസ്ജിദില്‍ ഔദ്യോഗിക ബഹുമതികളോടെയാണ് കബറടക്കം.

ചെന്നൈയിലെ സ്വകാര്യ ആശുപത്രിയില്‍ ചൊവ്വാഴ്ച ഉച്ച തിരിഞ്ഞ് മൂന്നേമുക്കാലോടെയായിരുന്നു കൊച്ചിന്‍ ഹനീഫയുടെ അന്ത്യം. സാലിഗ്രാമിലെ വസതിയില്‍ കൊണ്ടുവന്ന മൃതദേഹം പിന്നീടു ടി നഗറിലെ മലയാള ചലച്ചിത്ര പരിഷത്ത് ഓഫീസില്‍ പൊതുദര്‍ശനത്തിന് വെച്ചു. ഒട്ടേറെ ചലച്ചിത്ര പ്രവര്‍ത്തകരും പൗരപ്രമുഖരും തങ്ങളുടെ പ്രിയപ്പെട്ട നടന് ആദരാഞ്ജലി അര്‍പ്പിക്കാന്‍ ഇവിടെ എത്തിയിരുന്നു.