മുരളിയുടെ മടക്കം: കരുണാകരന്‍ ദില്ലിയില്‍

ദില്ലി: കോണ്‍ഗ്രസ് പ്രവര്‍ത്തക സമിതി യോഗത്തില്‍ പങ്കെടുക്കാനായി കെ കരുണാകരന്‍ ദില്ലിയിലെത്തി. യോഗത്തില്‍ പങ്കെടുക്കുകയെന്നതിലുപരി പാര്‍ട്ടി അധ്യക്ഷ സോണിയ ഗാന്ധിയെ നേരില്‍ കാണുകയാണ് പ്രവര്‍ത്തക സമിതിയിലെ പ്രത്യേക ക്ഷണിതാവായ കരുണാകരന്റെ ലക്ഷ്യം. ദില്ലിയിലെ കൊടും ശൈത്യം വകവയ്ക്കാതെ മൂടിപ്പുതച്ചാണ് അദ്ദേഹം എത്തിയത്.

കഴിഞ്ഞ മൂന്ന് പ്രവര്‍ത്തകസമിതി യോഗങ്ങളില്‍ കരുണാകരന്‍ പങ്കെടുത്തിരുന്നില്ല. അതിനാല്‍ ഇത്തവണ മുരളിയുടെ പ്രശ്‌നംകൂടി ചര്‍ച്ച ചെയ്യാനാണ് അദ്ദേഹം എത്തിയതെന്നാണ് രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു.

കെ മുരളീധരനെ തിരിച്ചെടുക്കേണ്ടെന്ന കെപിസിസി എക്‌സിക്യൂട്ടിവ് തീരുമാനത്തിനെതിരെ പരസ്യമായി എതിര്‍പ്പുപ്രകടിപ്പിച്ചതിന് ശേഷമുള്ള കരുണാകരന്റെ ആദ്യത്തെ ദില്ലി യാത്രയാണിത്. മൂന്നുദിവസം അദ്ദേഹം ദില്ലിയിലുണ്ടാവും.

ഈ ദിവസങ്ങളില്‍ കേരളത്തിന്റെ സംഘടനാ ചുമതലയുള്ള എഐസിസി ജനറല്‍ സെക്രട്ടറി മൊഹ്‌സീന കിദ്വായി, അഹമ്മദ് പട്ടേല്‍, മറ്റ് കേന്ദ്ര നേതാക്കള്‍ തുടങ്ങിയവരുമായും അദ്ദേഹം കൂടിക്കാഴ്ച നടത്തും.