രാഹുല്‍ എത്തി; മുംബൈയില്‍ പലയിടത്തും അറസ്റ്റ്

മുംബൈ: ശിവസേനയുടെ മറാത്താ വാദം വകയ്ക്കാതെ എഐസിസി ജനറല്‍ സെക്രട്ടറി രാഹുല്‍ ഗാന്ധി മുംബൈയില്‍ എത്തി.

ശിവസേനയുടെ ഭീഷണി നിലനില്‍ക്കുന്നതിനാല്‍ രാഹുല്‍ ഗാന്ധിയുടെ പ്രധാന സ്ഥലങ്ങളിലെ സന്ദര്‍ശന സമയങ്ങളില്‍ ചെറിയ മാറ്റം വരുത്തിയിട്ടുണ്ട്.

രാഹുലിന്റെ സന്ദര്‍ശനവുമായി ബന്ധപ്പെട്ട് മുംബൈയില്‍ പലയിടത്തും അറസ്റ്റുകള്‍ നടന്നിട്ടുണ്ട്. രാഹുലിന് സംസാരിക്കാനായി തയ്യാറാക്കിയ വേദിയ്ക്കരികില്‍ പ്രതിഷേധ പ്രകടനവുമായി എത്തിയ ശിവസേനാ പ്രവര്‍ത്തകരെ പോലീസ് അറസ്റ്റ് ചെയ്തു.

രാഹുലിന്റെ സന്ദര്‍ശനത്തിനെതിരെ കരിങ്കൊടി കാട്ടി പ്രതിഷേധിക്കാന്‍ ശിവസേനാ മേധാവി ബാല്‍താക്കറെ അണികള്‍ക്ക് കഴിഞ്ഞദിവസം നിര്‍ദേശം നല്‍കിയിരുന്നു.

സംഘാര്‍ഷവസ്ഥയാണ് പലയിടത്തുമുള്ളത്. ഈ സാഹചര്യത്തില്‍ കനത്ത സുരക്ഷാസന്നാഹമാണ് മുംബൈയിലെങ്ങും ഏര്‍പ്പെടുത്തിയിട്ടുള്ളത്.

മുംബൈ യൂത്ത് കോണ്‍ഗ്രസ്സിന്റെ അംഗത്വ പ്രചാരണത്തിന്റെ ഭാഗമായി വിദ്യാര്‍ഥികളോടും ചേരികളിലെ യുവാക്കളോടുമുള്ള സംവാദമാണ് രാഹുലിന്റെ മുഖ്യപരിപാടി.