രുചിക കേസ്: റാത്തോഡിന് കോടതിയില്‍ കുത്തേറ്റു

ചണ്ഡീഗഡ്: രുചിക കേസില്‍ ശിക്ഷിക്കപ്പെട്ട മുന്‍ ഹരിയാന ഡിജിപി എസ്പിഎസ് റാത്തോഡിന് കോടതിക്ക് മുമ്പില്‍വെച്ച് കത്തിക്കുത്തേറ്റു. മുഖത്ത് സാരമായി പരിക്കേറ്റ അദ്ദേഹത്തെ ആശുപത്രിയിലേക്ക് മാറ്റി.

റാത്തോഡിന്റെ തടവ് ശിക്ഷ രണ്ടുവര്‍ഷമായി ഉയര്‍ത്തണമെന്നാവശ്യപ്പെട്ട് സിബിഐ ചണ്ഡീഗഢ് കോടതിയില്‍ ഹര്‍ജി നല്‍കിയിരുന്നു. ഇതിന്റെ വാദം കേള്‍ക്കാനായി എത്തിയപ്പോഴാണ് റാത്തോഡിന് കുത്തേറ്റത്.

പൊലീസിന്റെ അകമ്പടിയോടെ വരികയായിരുന്ന റാത്തോഡിനടുത്തേക്ക് എത്തിയ ഒരു യുവാവ് കത്തികൊണ്ട് റാത്തോഡിന്റെ മുഖത്തും കഴുത്തിലും തുടരെ തുടരെ കുത്തുകയായിരുന്നു. ഉടന്‍ തന്നെ പൊലീസ് ഇയാളെ തള്ളിമാറ്റുകയും കസ്റ്റഡിയിലെടുക്കുകയും ചെയ്തു.

ഒരു ഫ്രീലാന്‍സ് പത്രപ്രവര്‍ത്തകനാണ് റാത്തോഡിനെ അക്രമിച്ചതെന്ന് പൊലീസ് അധികൃതര്‍ അറിയിച്ചു. മാധ്യമപ്രവര്‍ത്തകര്‍ക്കൊപ്പം നില്‍ക്കുയായിരുന്ന ഇയാള്‍ അഭിഭാഷകര്‍ക്കൊപ്പം റാത്തോഡ് വന്നപ്പോള്‍ തിരക്കിനിടയില്‍ നിന്ന് മുന്നോട്ട് വന്ന് അക്രമിയ്ക്കുയായിരുന്നു. കസ്റ്റഡിയിലെടുത്ത ഇയാളെ പൊലീസ് ചോദ്യം ചെയ്യുകയാണ്.

ടെന്നീസ് താരമായിരുന്ന രൂചികയെ ടെന്നീസ് ക്ലബില്‍വെച്ച് മാനഭംഗപ്പെടുത്തി എന്ന കേസില്‍ ആറുമാസം ശിക്ഷിക്കപ്പെട്ട റാത്തോഡ് അപ്പീല്‍ നല്‍കാനായി ഇപ്പോള്‍ ജാമ്യത്തിലാണ്. മാനഭംഗക്കേസ് വിവാദമായതോടെ പീഡിപ്പിക്കപ്പെട്ട കുടുംബത്തിന്റെ അവസ്ഥയില്‍ മനംനൊന്ത രുചിക പിന്നീട് ആത്മഹത്യചെയ്തിരുന്നു.

റാത്തോഡിനോട് രാജ്യം വിടരുതെന്നും പാസ് പോര്‍ട്ട് കോടതിയില്‍ ഒരാഴ്ചയ്ക്കകം സമര്‍പ്പിക്കണമെന്നും കോടതി നിര്‍ദേശിച്ചിട്ടുണ്ട്.