എഐടിയുസി എതിര്‍ക്കേണ്ടതില്ല: രാജേന്ദ്രന്‍

തിരുവനന്തപുരം: മൂന്നാറില്‍ ടാറ്റ അനധികൃതമായി പണിത തടയണ പൊളിക്കുന്നതിനെ എഐടിയുസി എതിര്‍ക്കേണ്ടതില്ലെന്ന് റവന്യുമന്ത്രി കെ.പി രാജേന്ദ്രന്‍ പറഞ്ഞു.

വ്യക്തമായ ധാരണയുടെ അടിസ്ഥാനത്തിലാണ് മന്ത്രിസഭാ ഉപസമിതിയുടെ റിപ്പോര്‍ട്ട് പ്രകാരം മന്ത്രിസഭ തീരുമാനമെടുത്തത്. ഇതില്‍ ആര്‍ക്കും അഭിപ്രായവ്യത്യാസമുണ്ടാകേണ്ട കാര്യമില്ല- അദ്ദേഹം പറഞ്ഞു.

തടയണ പൊളിക്കുന്ന കാര്യത്തില്‍ അഡ്വക്കേറ്റ് ജനറല്‍ സിപി സുധാകരപ്രസാദുമായി അഭിപ്രായഭിന്നതയില്ലെന്ന് മന്ത്രി അറിയിച്ചു.

തടയണകള്‍ പൊളിക്കാന്‍ തീരുമാനിച്ചിട്ടില്ലെന്നും കളക്ടര്‍ വാദം കേട്ട് അന്തിമതീരുമാനം എടുക്കുന്നത് വരെ നടപടിയൊന്നും ഉണ്ടാകില്ലെന്നും അഡ്വക്കറ്റേറ്റ് ജനറല്‍ സി.പി സുധാകരപ്രസാദ് കഴിഞ്ഞ ദിവസം ഹൈക്കോടതിയെ അറിയിച്ചിരുന്നു.

ഇക്കാര്യം അറിഞ്ഞ ഉടനെ തടയണ പൊളിക്കാനാണ് സര്‍ക്കാര്‍ തീരുമാനമെന്ന് മുഖ്യമന്ത്രി വിഎസ് അച്യുതാനന്ദന്‍ പ്രഖ്യാപിച്ചിരുന്നു.

എ.ജിയുടെ നിലപാട് വിവാദമായതോടെ തടയണ പൊളിക്കാന്‍ നിയമപരമായ നടപടിയെടുക്കുമെന്ന ഉത്തരവ് ശനിയാഴ്ച വൈകീട്ട് സര്‍ക്കാര്‍ ഔദ്യോഗികമായി പ്രസിദ്ധീകരണത്തിന് നല്‍കിയിരുന്നു.