പഞ്ചസാര കയറ്റുമതിക്കെതിരെ കടുത്ത പ്രതിഷേധം

ദില്ലി: സാധാരണക്കാരന്റെ നടുവൊടിയ്ക്കുന്ന വിലക്കയറ്റത്തിന്റെ കാലത്ത് യൂറോപ്യന്‍ യൂണിയനിലേക്ക് 10,000 ടണ്‍ പഞ്ചസാര കയറ്റി അയക്കാനുള്ള കേന്ദ്ര സര്‍ക്കാരിന്റെ നീക്കത്തിനെതിരെ കടുത്ത പ്രതിഷേധമുയരുന്നു. വിപണിയിലെ ലഭ്യതക്കുറവ് മൂലം പഞ്ചസാരയ്ക്ക് അമ്പത് ശതമാനത്തിലധികം വില ഉയര്‍ന്ന് നില്‍ക്കുന്ന പശ്ചാത്തലത്തിലാണ് കയറ്റുമതിയ്ക്ക് കേന്ദ്ര സര്‍ക്കാര്‍ അനുമതി നല്‍കിയിരിക്കുന്നത്.

അവശ്യസാധനങ്ങളുടെ വിലക്കയറ്റം പിടിച്ചുനിര്‍ത്താന്‍ സര്‍ക്കാര്‍ കഷ്ടപ്പെടുന്ന സമയത്ത് വന്നിരിയ്ക്കുന്ന തീരുമാനത്തിനെതിരെ കോണ്‍ഗ്രസില്‍ നിന്ന് തന്നെ വന്‍ എതിര്‍പ്പാണ് ഉണ്ടായിരിക്കുന്നത്. പഞ്ചസാരയുടെ ലഭ്യത കുറഞ്ഞിരിക്കുന്ന സമയത്ത് എടുത്ത തീരുമാനം തെറ്റാണെന്ന് കോണ്‍ഗ്രസ് വക്താവ് മനീഷ് തിവാരി പറഞ്ഞു. ഇത്തരത്തിലൊരു തീരുമാനം കൈക്കൊണ്ടിട്ടുണ്ടെങ്കില്‍ അതിന് വിശദീകരണം നല്‍കേണ്ടേത് ഭക്ഷ്യമന്ത്രിയും അദ്ദേഹത്തിന്റെ മന്ത്രാലയവുമാണെന്നും അദ്ദേഹം വിശദീകരിച്ചു.

ശുദ്ധീകരിച്ച വെളുത്ത പഞ്ചസാര 10,000 ടണ്‍ യൂറോപ്യന്‍ രാജ്യങ്ങളിലേയ്ക്ക് കയറ്റി അയക്കാനുള്ള തീരുമാനം തിങ്കളാഴ്ചയാണ് കേന്ദ്രസര്‍ക്കാര്‍ എടുത്തത്. ജനുവരി മാസത്തില്‍ പഞ്ചസാര വിലയില്‍ 58.96 ശതമാനം വര്‍ധനവാണ് രേഖപ്പെടുത്തിയത്.