മാവോയിസ്റ്റ് ആക്രമണം: 24 സൈനികര്‍ കൊല്ലപ്പെട്ടു

കൊല്‍ക്കത്ത: പശ്ചിമബംഗാളിലെ വെസ്റ്റ് മിഡ്‌നാപുര്‍ ജില്ലയില്‍ രണ്ട് സൈനിക ക്യാമ്പുകള്‍ക്കു നേരെ മാ വോയിസ്റ്റുകള്‍ നടത്തിയ ആക്രമണത്തില്‍ 24 സൈനികര്‍ കൊല്ലപ്പെട്ടു. 10 ജവാന്മാരെ കാണാതായി. മരണസംഖ്യ ഉയരാന്‍ ഇടയുണ്ട്. അര്‍ദ്ധ സൈനിക വിഭാഗമായ ഈസ്‌റ്റേണ്‍ ഫ്രോണ്ടിയര്‍ റൈഫിള്‍സിലെ 35 പേരുള്‍പ്പെടെ 51 ജവാന്മാര്‍ ആക്രമണസമയത്ത് ക്യാമ്പിലുണ്ടായിരുന്നു.

ആക്രമണത്തെത്തുടര്‍ന്നുണ്ടായ ഒരുമണിക്കൂര്‍ നീണ്ട വെടിവെപ്പില്‍ രണ്ട് മാവോയിസ്റ്റുകളും മരിച്ചു. മാവോയിസ്റ്റുകള്‍ക്കെതിരെ കേന്ദ്രസര്‍ക്കാര്‍ ആവിഷ്‌ക്കരിച്ച 'ഓപ്പറേഷന്‍ ഗ്രീന്‍ ഹണ്ട്' എന്നുപേരിട്ട സൈനിക നടപടി തുടങ്ങുന്നതിന് ദിവസങ്ങള്‍ മാത്രം ബാക്കിനില്‍ക്കെയാണ് സംഭവം. 'ഓപ്പറേഷന്‍ ഗ്രീന്‍ ഹണ്ടി'ലെ അംഗങ്ങളുടെ സില്‍ദിയയിലെ ക്യാമ്പിനുനേരെ തിങ്കളാഴ്ച വൈകിട്ട് 5.30ഓടെയാണ് ആക്രമണമുണ്ടായത്. വൈകാതെ ധരംപുരിലെ ക്യാമ്പും മാവോയിസ്റ്റുകള്‍ ആക്രമിച്ചു. ആക്രമണത്തിന്റെ ഉത്തരവാദിത്വം ഏറ്റെടുത്ത് മാവോയിസ്റ്റ് നേതാവ് കിഷന്‍ജി 35 സൈനികരെ വധിച്ചതായി അവകാശപ്പെട്ടു.

'ഓപ്പറേഷന്‍ ഗ്രീന്‍ ഹണ്ടി'ന് കേന്ദ്ര ആഭ്യന്തരമന്ത്രി പി ചിദംബരത്തിനുള്ള മറുപടിയാണിതെന്ന് മാവോയിസ്റ്റ് നേതാവ് കിഷന്‍ജി അജ്ഞാതതാവളത്തില്‍ നിന്ന് സ്വകാര്യചാനലിനോട് ഫോണില്‍ പറഞ്ഞു. മാവോയിസ്റ്റുകള്‍ക്ക് നേരെയുള്ള ആക്രമണം കേന്ദ്രം അവസാനിപ്പിച്ചില്ലെങ്കില്‍ ഈ രീതിയില്‍മാത്രം മറുപടി നല്‍കാനാണ് തീരുമാനിച്ചിരിക്കുന്നതെന്ന് അദ്ദേഹം വ്യക്തമാക്കി. കേന്ദ്രസര്‍ക്കാരുമായി ചര്‍ച്ചയ്ക്കു തയ്യാറാണെന്നും പക്ഷേ, സര്‍ക്കാര്‍ ആക്രമണങ്ങള്‍ അവസാനിപ്പിക്കണമെന്നും കിഷന്‍ജി പറഞ്ഞു. മാര്‍ച്ച് ആദ്യവാരത്തോടെ 'ഓപ്പറേഷന്‍ ഗ്രീന്‍ഹണ്ട്' വിപുലമായ തോതില്‍ ആരംഭിക്കുമെന്നാണ് കരുതുന്നത്.

25 മോട്ടോര്‍ സൈക്കിളുകളിലായെത്തിയ നൂറോളം അക്രമികള്‍ ക്യാമ്പ് ആക്രമിച്ച് സൈനികരെ വധിച്ച് ഇവിടെയുണ്ടായിരുന്ന ആയുധങ്ങളുമായി കടന്നുകളയുകയായിരുന്നു. ക്യാമ്പിന് തീവെക്കുകയും ചെയ്തു.