മുല്ലപ്പെരിയാര്‍: എഎസ് ആനന്ദ് സമിതി അധ്യക്ഷന്‍

ദില്ലി: മുല്ലപ്പെരിയാര്‍ അണക്കെട്ടിനെ ചൊല്ലി കേരളവും തമിഴ്‌നാടും തമ്മിലുള്ള തര്‍ക്ക വിഷയങ്ങളില്‍ പഠിച്ച് പരിഹാരം നിര്‍ദ്ദേശിയ്ക്കാനുള്ള അഞ്ചം ഉന്നതാധികാര സമിതി അധ്യക്ഷനായി മുന്‍ സുപ്രീം കോടതി ചീഫ് ജസ്റ്റിസ് എഎസ് ആനന്ദിനെ നിയമിച്ചു. നാല് ആഴ്ചയ്ക്കകം കേന്ദ്രസര്‍ക്കാര്‍ വിജ്ഞാപനത്തിലൂടെ സമിതി രൂപീകരിക്കണമെന്ന് സുപ്രീംകോടതി നിര്‍ദ്ദേശിച്ചു. സമിതി നിലവില്‍വന്ന് ആറു മാസത്തിനകം റിപ്പോര്‍ട്ട് സമര്‍പ്പിക്കണം.

സുപ്രീംകോടതി പരിഗണിക്കുന്ന ഭരണഘടനാപരവും നിയമപരവുമായ വിഷയങ്ങള്‍ ഒഴികെ മുല്ലപ്പെരിയാറുമായി ബന്ധപ്പെട്ട എല്ലാ കാര്യങ്ങളും വിദഗ്ദ സമിതി പരിശോധിക്കും.ഡാമിന്റെ സുരക്ഷ, പരിസ്ഥിതി പ്രശ്‌നങ്ങള്‍, പുതിയ ഡാമിന്റെ സാധ്യത, സാങ്കേതികവിഷയങ്ങള്‍, തുടങ്ങിയവ ഇതിലുള്‍പ്പെടും.

കേന്ദ്രം നിര്‍ദ്ദേശിക്കുന്ന രണ്ട് അംഗങ്ങളും കേരളത്തിലെയും തമിഴ്‌നാട്ടിലെയും ഓരോ പ്രതിനിധികളുമാണ് സമിതിയില്‍ ഉണ്ടാവുക. അതേ സമയം കേന്ദ്ര ജലകമ്മീഷനെ സമിതിയില്‍ ഉള്‍പ്പെടുത്തരുതെന്ന കേരളത്തിന്റെ ആവശ്യം കോടതി അംഗീകരിച്ചിട്ടുണ്ട്.

സമിതിയുടെ ഓഫീസ്, പ്രവര്‍ത്തനം തുടങ്ങിയ എല്ലാ ചെലവുകളും കേന്ദ്ര സര്‍ക്കാര്‍ വഹിക്കണം. ഈ വര്‍ഷം സെപ്തംബര്‍ ഇരുപതിന് കേസ് കോടതി പരിഗണിക്കും. ഇതിന് മുന്‍പായി റിപ്പോര്‍ട്ട് സമര്‍പ്പിക്കാനാണ് നിര്‍ദ്ദേശിച്ചിരിക്കുന്നത്.