ചരക്ക് കൂലി വര്‍ദ്ധനയില്ല

ദില്ലി: ഈ വര്‍ഷത്തെ റെയില്‍വെ ബജറ്റില്‍ ചരക്കുകൂലി വര്‍ദ്ധനയില്ലെന്ന് മമതാ ബാനര്‍ജി അറിയിച്ചു. യാത്രാക്കൂലി ഇനത്തില്‍ എസി ക്ലാസില്‍ 20 രൂപയും സ്ലീപ്പര്‍ ക്ലാസില്‍ പത്ത് രൂപയും സര്‍വീസ് ചാര്‍ജ്ജിളവ് പ്രഖ്യാപിച്ചിട്ടുണ്ട്. മണ്ണെണ്ണ ഭക്ഷ്യധാന്യം എന്നിവയുടെ കടത്തുകൂലിയില്‍ ഇളവ് പ്രഖ്യാപിച്ചത് രാജ്യത്തെ വിലക്കയറ്റത്തിന് ചെറിയൊരു ആശ്വാസമാകുമെന്നാണ് കരുതപ്പെടുന്നത്.

കേരളം ഏറെ പ്രതീക്ഷയോടെ കാത്തിരുന്ന പാലക്കാട്ടെ കോച്ച് ഫാക്ടറിക്ക് ബജറ്റില്‍ അന്തിമാനുമതി നല്‍കി. കോച്ച് ഫാക്ടറി ഈ വര്‍ഷം തന്നെ സ്ഥാപിക്കുമെന്ന് മന്ത്രി വ്യക്തമാക്കി.

തിരുവനന്തപുരത്ത് കുടിവെള്ള പ്ലാന്റ് സ്ഥാപിക്കുമെന്നതാണ് മറ്റൊരു പ്രഖ്യാപനം. അതേ സമയം ദക്ഷിണ ചരക്ക് ഇടനാഴിയില്‍ നിന്ന് സംസ്ഥാനത്തെ ഒഴിവാക്കിയത് കേരളത്തിന് തിരിച്ചടിയായി. കേരളത്തില്‍ നിന്നുള്ള എംപിമാര്‍ ഇതിനെതിരെ പ്രതിഷേധിയ്ക്കുകയും ചെയ്തു.

റെയില്‍ഭവനില്‍നിന്നും കേന്ദ്ര റെയില്‍വേ സഹമന്ത്രിമാരായ ഇ. അഹമ്മദിനും കെഎച്ച് മുനിയപ്പയ്ക്കുമൊപ്പമാണ് മമതാ ബാനര്‍ജി ബജറ്റ് അവതരണത്തിനായി പാര്‍ലമെന്റിലെത്തിയത്.