ശാസ്ത്രജ്ഞന്റെ കൊല; പിന്നില്‍ സ്വവര്‍ഗാനുരാഗം?

മുംബൈ: ഭാഭാ ആറ്റോമിക് റിസര്‍ച്ച് സെന്ററിലെ മുതിര്‍ന്ന ശാസ്ത്രജ്ഞനായിരുന്ന മഹാദേവ അയ്യരുടെ കൊലക്കേസ് പുതിയ വഴിത്തിരിവില്‍.

48കാരനായ അയ്യരുടെ കൊലയ്ക്ക് പിന്നില്‍ സ്വവര്‍ഗാനുരാഗവുമായി ബന്ധപ്പെട്ട പ്രശ്‌നങ്ങളാണെന്ന് സൂചന നല്‍കുന്ന തെളിവുകള്‍ അന്വേഷണ ഉദ്യോഗസ്ഥര്‍ക്ക് ലഭിച്ചു.

തിങ്കളാഴ്ചയാണ് അയ്യരെ കൊല്ലപ്പെട്ട നിലയില്‍ ബാര്‍ക് ക്വാട്ടേഴ്‌സില്‍ കണ്ടെത്തിയത്. ബാര്‍ക്കിന്റെ റിയാക്ടര്‍ ഗ്രൂപ്പില്‍ മെക്കാനിക്കല്‍ എന്‍ജിനീയറായി ജോലിനോക്കുന്ന അയ്യര്‍ അവിവാഹിതനാണ്. തമിഴ്‌നാട് സ്വദേശിയാണ് ഇദ്ദേഹം.

ക്വാട്ടേഴ്‌സിലെ കിടപ്പുമുറിയിലെ മെത്തയില്‍ കഴുത്തില്‍ കയര്‍കെട്ടിയിട്ട നിലയിലായിരുന്നു മൃതദേഹം കണ്ടെത്തിയത്. എന്നാല്‍ ഈ കയര്‍ കൊണ്ട് കഴുത്തുഞെരിച്ചല്ല കൊലനടത്തിയതെന്ന് പിന്നീട് വ്യക്തമായിരുന്നു. എന്തോ ഭാരമേറിയ ആയുധം കൊണ്ട് തലയില്‍ അടിച്ചതായും കണ്ടെത്തിയിരുന്നു.

വീട്ടില്‍ നിന്നും പ്ലേറ്റുകള്‍, മദ്യക്കുപ്പികള്‍, കോണ്ടം പാക്കറ്റുകള്‍ അശ്ലീലചിത്രങ്ങള്‍ എന്നിവയും കണ്ടെത്തിയിരുന്നു. ഇവയാണ് വഴിവിട്ട ബന്ധത്തെക്കുറിച്ച് പൊലീസിന് സംശയം ജനിപ്പിച്ചിരിക്കുന്നത്. മാത്രമല്ല മുറിയില്‍ പലയിടത്തുനിന്നും അയ്യരുമായി ബന്ധമുള്ള രണ്ടുപേരുടേതിന് സമാനമായ വിരലടയാളങ്ങള്‍ കണ്ടെത്തിയിട്ടുണ്ട്.