കോലം കത്തിക്കുന്തോറും ആയുസ്സ് കൂടുന്നു: അഴീക്കോട്

കണ്ണൂര്‍: കോലം കത്തിക്കുന്തോറും തന്റെ ആയുസ്സ് കൂടിവരികയാണെന്ന് സുകുമാര്‍ അഴീക്കോട്. കണ്ണമംഗലം കഴകം പെരുങ്കളിയാട്ടത്തിന്റെ ഭാഗമായുള്ള കലാസാംസ്‌കാരിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ചരിത്രത്തിന്റെ പ്രഭാവവും പ്രചോദനവും ഉള്‍ക്കൊള്ളാത്തവരാണ് കോലം കത്തിക്കലുമായി നടക്കുന്നത്. ഹൃദയത്തില്‍നിന്നുള്ള ഉറവകള്‍ ഇപ്പോള്‍ വറ്റിവരളുകയാണ്. കോലത്തുനാടിന്റെ സംസ്‌കാരം കോലം കത്തിക്കലല്ല, കോലം കെട്ടലാണ്. ഈ നാട്ടുകാര്‍ക്ക് കോലം കത്തിക്കല്‍ അപരിചിതമാണ്.

കലാകാരന്റെയും എഴുത്തുകാരന്റെയും ഇടയില്‍ അധികാരശക്തികള്‍ കയറിനില്ക്കുമ്പോള്‍ അവരെ പിടിച്ചുമാറ്റി ഒരു സാംസ്‌കാരിക സമ്മര്‍ദം അധികാരികളുടെ മുന്നിലെത്തിക്കണം. അതിന് എഴുത്തുകാരനും കലാകാരനും തയ്യാറാവണം. ഒരു രാഷ്ട്രീയപ്രസ്ഥാനവും ആരോടും ഒന്നിച്ചുനടക്കാന്‍ ആഹ്വാനം ചെയ്യുന്നില്ല- അഴീക്കോട് പറഞ്ഞു.

തിലകന്‍ പ്രശ്‌നത്തില്‍ അഴീക്കോട് ഇടപെടുകയും മോഹന്‍ലാലിനെതിരെ രൂക്ഷമായ ഭാഷയില്‍ പ്രസ്താവനകള്‍ നടത്തുകയും ചെയ്തതില്‍ പ്രതിഷേധിച്ച് ലാലിന്റെ ആരാധകര്‍ കഴിഞ്ഞ ദിവസം അഴീക്കോടിന്റെ കോലം കത്തിച്ചിരുന്നു.