'മന്ത്രിപുത്രനും യുവതിയും'- മഞ്ചേരിയില്‍ അടി

മഞ്ചേരി: മഞ്ചേരിയിലെ ബാര്‍ ഹോട്ടലില്‍ ഒരു മന്ത്രിപുത്രന്‍ യുവതിയ്‌ക്കൊപ്പമുണ്ടെന്ന അഭ്യൂഹത്തെ തുടര്‍ന്ന് യൂത്ത് കോണ്‍ഗ്രസുകാര്‍ നടത്തിയ തെരച്ചില്‍ സംഘര്‍ഷത്തിനിടയാക്കി. ഞായറാഴ്ച വൈകിട്ട് മൂന്നരയോടെയായിരുന്നു സംഭവം. നഗരത്തിലെ ഒരു പ്രമുഖ ബാര്‍ അറ്റാച്ച്ഡ് ലോഡ്ജിലാണ് മന്ത്രിപുത്രനെ കുടുക്കാന്‍ യൂത്ത് കോണ്‍ഗ്രസ് പ്രവര്‍ത്തകര്‍ തെരച്ചില്‍ നടത്തിയത്

ഹോട്ടലിന് മുമ്പില്‍ ജനത്തിരക്കായതോടെ വന്‍ പൊലീസ് സംഘവും സ്ഥലത്തെത്തി. തുടര്‍ന്ന് യൂത്ത് കോണ്‍ഗ്രസ് പ്രവര്‍ത്തകരും പൊലീസും നടത്തിയ തെരച്ചിലില്‍ മന്ത്രിപുത്രനെ കണ്ടെത്താന്‍ കഴിഞ്ഞില്ല. കഴമ്പില്ലാത്തതായിരുന്നു ആരോപണം.

അതിനിടെ ലോഡ്ജ് വളഞ്ഞ യൂത്ത് കോണ്‍ഗ്രസ് പ്രവര്‍ത്തകരെ വളഞ്ഞുകൊണ്ട് അപ്പോഴേക്കും ഡിവൈഎഫ്‌ഐ പ്രവര്‍ത്തകര്‍ സ്ഥലത്തെത്തി. മന്ത്രിയുടെ മകനുണ്ടെങ്കില്‍ പിടിയ്ക്കണമെന്നും എന്നിട്ട് പോയാല്‍ മതിയെന്ന് അവരും പറഞ്ഞതോടെ സ്ഥലത്ത് സംഘര്‍ഷാവസ്ഥയായി. വിവരമറിഞ്ഞെത്തിയ മാധ്യമപ്രവര്‍ത്തകരെയും അവര്‍ വളഞ്ഞു.

ഇതിനിടെ ലീഗ് പ്രവര്‍ത്തകരും സ്ഥലത്തെത്തിയതോടെ വാക്കേറ്റം കയ്യാങ്കളിയിലേക്ക് നീങ്ങി. തുടര്‍ന്ന് പൊലീസ് ഇടപെട്ട് കൂടുതല്‍ സംഘര്‍ഷം ഒഴിവാക്കുകയായിരുന്നു.