സൗദി പരാമര്ശം: തരൂരിനെതിരെ പാര്ട്ടിയില് പട
തുടര്ച്ചയായി വിവാദങ്ങള് സൃഷ്ടിക്കുന്ന തരൂരിന് സര്ക്കാരിനും പാര്ട്ടിക്കും തലവേദനയാകുന്നുവെന്ന് കോണ്ഗ്രസിലെ ഒരുവിഭാഗം പാര്ട്ടി ഹൈക്കമാന്ഡിനോട് പരാതിപ്പെട്ടിട്ടുണ്ടെന്നാണ് അറിയുന്നത്. ഇതേത്തുടര്ന്ന് തുടര്ന്ന് തരൂരില് നിന്ന് കൃത്യമായ അകലം പാലിക്കാന് കോണ്ഗ്രസ് ഹൈക്കമാന്ഡ് നേതാക്കള്ക്ക് നിര്ദേശം നല്കിയതായും സൂചനയുണ്ട്.
വിലക്കയറ്റം, പെട്രോള് വില വര്ധന തുടങ്ങിയവയുടെ പേരില് പ്രതിരോധത്തിലായതിനു പിന്നാലെയാണ് തരൂരിന്റെ പ്രസ്താവനയും സര്ക്കാരിന് തലവേദനയായത്. എന്നാല് മധ്യസ്ഥന്റെ റോളിലല്ല താന് സൗദിയെ ഉദ്ദേശിച്ചതെന്നും തന്റെ പ്രസ്താവന മാധ്യമങ്ങള് വളച്ചൊടിച്ചതാണെന്നും തരൂര് പറഞ്ഞിരുന്നു.
സൗദിക്ക് പാകിസ്താനുമായി നല്ല ബന്ധമാണുള്ളത്. അതുകൊണ്ടു തന്നെ 'ഇന്റര്ലൊക്യൂട്ടര്' എന്ന വാക്കു കൊണ്ട് താന് ഉദ്ദേശിച്ചത് സൗദി നമ്മുടെ പ്രശ്നങ്ങള് അനുഭാവത്തോടെ കേള്ക്കുന്നുവെന്നാണെന്നാണ് തരൂരിന്റെ വിശദീകരണം.
എന്തായാലും സര്ക്കാരിനും കോണ്ഗ്രസിനും തരൂരിന്റെ വിശദീകരണം പൂര്ണമായി ദഹിച്ചിട്ടില്ല. ഇന്ത്യപാക് പ്രശ്നങ്ങളില് മധ്യസ്ഥന്റെ പങ്കാളിത്തം ആവശ്യമില്ലെന്ന നിലപാടില് മാറ്റമില്ലെന്ന് പ്രധാനമന്ത്രിയുടെ ഓഫീസ് ഞായറാഴ്ച രേഖാമൂലം വ്യക്തമാക്കുകയും ചെയ്തിരുന്നു.