ഉഗാണ്ടയില്‍ മണ്ണിടിച്ചില്‍; 100 മരണം

കംപാല: കനത്ത മഴയെ തുടര്‍ന്ന് കിഴക്കന്‍ ഉഗാണ്ടയിലുണ്ടായ മണ്ണിടിച്ചിലില്‍ നൂറിലേറെ പേര്‍ മരിച്ചു. 60 കുട്ടികളടക്കം 300ലേറെ പേരെ കാണാതായിട്ടുണ്ട്.

ഒരു ആരോഗ്യകേന്ദ്രത്തില്‍ അഭയം പ്രാപിച്ചിരുന്ന ആറുപതോളം കുട്ടികളെയാണ് കാണാതായത്. ഇവര്‍ തങ്ങിയിരുന്ന കെട്ടിടം മണ്ണിടിച്ചിലില്‍ പെടുകയായിരുന്നു.

കനത്ത മഴയും ആവശ്യമായ ഉപകരണങ്ങളുടെ ലഭ്യതക്കുറവും രക്ഷാപ്രവര്‍ത്തനം ദുഷ്‌കരമാക്കുന്നുണ്ട്. മണ്ണിനടിയില്‍ കുടുങ്ങിയവര്‍ക്കായി രക്ഷാപ്രവര്‍ത്തകര്‍ തിരച്ചില്‍ നടത്തുകയാണ്. മരണസംഖ്യ ഇനിയും ഉയര്‍ന്നേക്കുമെന്നാണ് സൂചന.

പോലീസിന്റേയും സന്നദ്ധപ്രവര്‍ത്തകരുടേയും സഹായത്തോടെ ദുരിതാശ്വാസ പ്രവര്‍ത്തനങ്ങള്‍ നടത്തുന്നുണ്ടെന്ന് മന്ത്രി ടാര്‍സിസ് കബ്‌വെഗേര പറഞ്ഞു. അവശ്യസംവിധാനങ്ങളുടെ അഭാവം മൂലം കാര്യക്ഷമമായ രീതിയില്‍ ദുരിതാശ്വാസ പ്രവര്‍ത്തനങ്ങള്‍ നടത്താന്‍ കഴിയുന്നില്ലെന്നും റിപ്പോര്‍ട്ടുണ്ട്.

ഏഴു മണിക്കൂര്‍ നീണ്ട കനത്ത മഴയ്‌ക്കൊടുവിലാണ് മണ്ണിടിച്ചില്‍ ഉണ്ടായത്. ഉഗാണ്ടയിലെ ബുദുദ മേഖലയിലെ മലയോരപ്രദേശത്താണ് ഏറ്റവും കൂടുതല്‍ നാശ നഷ്ടങ്ങളുണ്ടായിട്ടുള്ളത്.