നഷ്ടപരിഹാരം നല്‍കാന്‍ പണമില്ലെന്ന് മായാവതി

ലഖ്‌നൊ: നൂറ് കണക്കിന് കോടി ചെലവിട്ട പ്രതിമാ പാര്‍ക്കുകള്‍ നിര്‍മ്മിച്ചു കൊണ്ടിരിയ്ക്കുന്ന ഉത്തര്‍പ്രദേശ് സര്‍ക്കാരിന് രാംജാനകി ക്ഷേത്രത്തിലെ ദുരന്തത്തില്‍ മരിച്ചവരുടെ കുടുംബങ്ങള്‍ക്ക് നല്‍കാന്‍ പണമില്ല. സംസ്ഥാന കടുത്ത സാമ്പത്തിക പ്രതിസന്ധിയിലാണെന്നും നഷ്ടപരിഹാരം നല്‍കാന്‍ പണമില്ലെന്നും യുപി മുഖ്യമന്ത്രി മായാവതി പറഞ്ഞു.

ദുരന്തത്തില്‍ മരിച്ചവരുടെ കുടുംബാംഗങ്ങള്‍ക്കും പരുക്കേറ്റവര്‍ക്കും കേന്ദ്രസര്‍ക്കാര്‍ ധനസഹായം നല്‍കണമെന്നും മായാവതി പത്രക്കുറിപ്പില്‍ അഭ്യര്‍ഥിച്ചു.

തന്റെ പ്രതിമയ്ക്ക് പുറമെ അംബേദ്കര്‍, കാന്‍ഷിറാം എന്നിവരുടെയും പാര്‍ട്ടി ചിഹ്നമായ ആനയുടെയും പ്രതിമകള്‍ സംസ്ഥാനമൊട്ടാകെ നിര്‍മ്മിയ്ക്കുന്ന മായാവതി സംസ്ഥാനം സാമ്പത്തിക പ്രതിസന്ധിയിലാണെന്ന് പരാതിപ്പെടുന്നത് വിമര്‍ശനത്തിനിടയാക്കിയിട്ടുണ്ട്. കഴിഞ്ഞദിവസം പ്രതാപ് ഗഡിലെ കൃപാല്‍ജി മഹാരാജ് ആശ്രമത്തിലെ ക്ഷേത്രത്തില്‍ അന്നദാനത്തിനിടെ ഉണ്ടായ തിരക്കില്‍ പെട്ട് 64 പേരാണ് മരിച്ചത്.