രാജ് താക്കറെയ്ക്ക് സുപ്രീം കോടതിയുടെ താക്കീത്

ദില്ലി: ഉത്തരേന്ത്യക്കാര്‍ക്കെതിരെയുള്ള പ്രസംഗങ്ങള്‍ അവസാനിപ്പിയ്ക്കണമെന്ന് മഹാരാഷ്ട്ര നവനിര്‍മാണ്‍ സേന മേധാവി രാജ് താക്കറെയോട് സുപ്രീം കോടതി ആവശ്യപ്പെട്ടു. ഇത്തരം പ്രസംഗങ്ങള്‍ നടത്തിയതിന് രാജ്യത്തിന്റെ വിവിധഭാഗങ്ങളില്‍ രാജ് താക്കറെയ്‌ക്കെതിരെ ക്രിമിനല്‍ കേസുകള്‍ നിലനില്‍ക്കുന്ന സാഹചര്യത്തിലാണിത്.

ഇനിയും പ്രകോപനപരമായ പ്രസംഗങ്ങള്‍ നടത്തിയാല്‍ രാജിനെതിരേ കേസെടുക്കുമെന്നും കോടതി വ്യക്തമാക്കി.

പട്‌നയിലും ജംഷഡ്പൂരിലും ഉത്തര്‍പ്രദേശിലും തനിക്കെതിരെ രജിസ്റ്റര്‍ ചെയ്ത കേസുകള്‍ ദില്ലിയിലേക്ക് മാറ്റണമെന്നാവശ്യപ്പെട്ട് സുപ്രീംകോടതിയെ രാജ് സമീപിച്ചിരുന്നു. മഹാരാഷ്ട്രയിലെ വിവിധ കോടതികളിലായി 73ലധികം ക്രിമിനല്‍ കേസുകള്‍ രാജ്താക്കറയ്‌ക്കെതിരെ നിലവിലുണ്ട്.