മൂന്നാര്‍: കേരളം സത്യവാങ്മൂലം സമര്‍പ്പിക്കണം

ദില്ലി: മൂന്നാറിലെ കയ്യേറ്റങ്ങള്‍ സംബന്ധിച്ച ഹര്‍ജി പരിഗണിയ്ക്കുന്നത് സുപ്രീം കോടതി ഉന്നതാധികാര സമിതി ഏപ്രില്‍ 26 ലേയ്ക്ക് മാറ്റി. ഇത് സംബന്ധിച്ച് കേരളാ സര്‍ക്കാര്‍ സമിതിയ്ക്ക് മുന്‍പാകെ ഇടക്കാല റിപ്പോര്‍ട്ട് സമര്‍പ്പിച്ചു. അടുത്ത തവണ കേസ് പരിഗണിയ്ക്കുന്നതിന് മുന്‍പ് കേരളം വിശദമായ സത്യവാങ്മൂലം നല്‍കണമെന്ന് സമിതി നിര്‍ദ്ദേശിച്ചു. അതേ സമയം പ്രശ്‌നം പഠിയ്ക്കാന്‍ വിദഗ്ധ സംഘത്തെ നിയോഗിച്ചിട്ടുണ്ടെന്നും ഇവരുടെ റിപ്പോര്‍ട്ട് ഏപ്രില്‍ 15നകം ലഭിയ്ക്കുമെന്നും കേന്ദ്രസര്‍ക്കാര്‍ കോടതിയെ അറിയിച്ചു.

മൂന്നാറിലെ 12,372 ഏക്കര്‍ കൈയ്യേറ്റഭൂമി ഇതു വരെ ഒഴിപ്പിച്ചിട്ടുണ്ടെന്നാണ് സംസ്ഥാന സര്‍ക്കാര്‍ ഉന്നതാധികാര സമിതിയ്ക്ക് സമര്‍പ്പിച്ച റിപ്പോര്‍ട്ടില്‍ വിശദീകരിയ്ക്കുന്നത്. ചൊവ്വാഴ്ച ചേര്‍ന്ന മന്ത്രിസഭാ ഉപസമിതി മൂന്നാര്‍ വിഷയത്തില്‍ വിശദമായ സത്യവാങ്മൂലം പിന്നീട് നല്‍കാമെന്ന തീരുമാനത്തിലെത്തിച്ചേര്‍ന്നതിനാലാണ് ഇപ്പോള്‍ ഇടക്കാല റിപ്പോര്‍ട്ട് സമര്‍പ്പിച്ചത്. സത്യവാങ്മൂലത്തിന്റെ കാര്യത്തില്‍ ഉപസമിതിയില്‍ ചേരിതിരിവ് ഉടലെടുത്തിരുന്നു.

മൂന്നാര്‍ പ്രശ്‌നം പഠിയ്ക്കാന്‍ പ്രത്യേക സമിതിയെ നിയോഗിച്ചിട്ടുണ്ടെന്നും സമിതിയുടെ റിപ്പോര്‍ട്ട് ലഭിയ്ക്കുന്നത് വരെ അന്തിമ തീരുമാനം എടുക്കരുതെന്നുമാണ് കേന്ദ്ര വനം പരിസ്ഥിതി മന്ത്രാലയം കോടതിയില്‍ ആവശ്യപ്പെട്ടത്.

മൂന്നാറിലെ വനഭൂമി പ്രശ്‌നം സംബന്ധിച്ച് വണ്‍ എര്‍ത്ത്, വണ്‍ ലൈഫ് എന്ന സംഘടന സമര്‍പ്പിച്ച ഹര്‍ജിയാണ് സുപ്രീം കോടതി സമിതി പരിഗണിയ്ക്കുന്നത്.