പോള്‍ വധം: പൊലീസിന്റെ വഴിയെ സിബിഐയും

കൊച്ചി: പ്രമാദമായ മുത്തൂറ്റ് പോള്‍ എം ജോര്‍ജ്ജ് വധക്കേസില്‍ പൊലീസിന്റെ കണ്ടെത്തലുകള്‍ തള്ളിക്കളയാനാവില്ലെന്ന് സിബിഐ. കേസിലെ എട്ടാം പ്രതിയുടെ ജാമ്യാപേക്ഷ പരിഗണിച്ച ഹൈക്കോടതിയ്ക്ക് മുമ്പാകെയാണ് സിബിഐ ഇക്കാര്യം വ്യക്തമാക്കിയത്.

പോളിന്റെ വധം ആകസ്മികമാണെന്ന പൊലീസിന്റെ കണ്ടെത്തലിലേക്ക് സിബിഐയും എത്തിച്ചേരുകയാണെന്ന് ഇതോടെ വ്യക്തമായിരിക്കുകയാണ്. പോള്‍ വധം ആദ്യം അന്വേഷിച്ച സംസ്ഥാന പോലീസില്‍ നിന്ന് ഹൈക്കോടതി നിര്‍ദ്ദേശ പ്രകാരം സിബിഐ കേസ് ഏറ്റെടുക്കുകയായിരുന്നു.

അതേ സമയം കാരി സതീശന്‍ പോളിനെ കുത്താനുപയോഗിച്ചതെന്ന് പൊലീസ് കണ്ടെത്തിയ കത്തി വ്യാജമായിരുന്നുവെന്ന് സിബിഐ നേരത്തേ കോടതിയില്‍ വ്യക്തമാക്കിയിരുന്നു. യഥാര്‍ത്ഥ കത്തി സിബിഐ കണ്ടെത്തുകയും ചെയ്തു. കത്തിയുടെ കാര്യമൊഴിച്ച് പൊലീസിന്റെ മറ്റു കണ്ടെത്തലുകള്‍ ശരിവെയ്ക്കുകയാണ് സിബിഐ.