കോഴിക്കോട് സ്‌ഫോടനം: പ്രധാനപ്രതി അറസ്റ്റില്‍

കൊച്ചി: കോഴിക്കോട് ഇരട്ട സ്‌ഫോടനക്കേസിലെ പ്രധാന പ്രതികളിലൊരാളായ ഷമ്മി ഫിറോസിനെ എന്‍ഐഎ അറസ്റ്റ് ചെയ്തു. അബുദാബിയില്‍നിന്ന് കൊച്ചിയിലേയ്ക്കുവന്ന ഷമ്മിയെ നെടുമ്പാശ്ശേരി വിമാനത്താവളത്തില്‍ നിന്നാണ് ചെയ്തത്.

പരപ്പനങ്ങാടി സ്വദേശിയാണ് ഷമ്മി ഫിറോസ്. അബുദാബിയില്‍ ഒളിവില്‍ കഴിയുകയായിരുന്ന ഷമ്മി നെടുമ്പാശ്ശേരിയിലെത്തുമെന്ന് എന്‍ഐഎ അന്വേഷണ സംഘത്തിന് വിവരം ലഭിച്ചിരുന്നു. ഇയാളുടെ അബുദാബിയിലെ തൊഴിലിടവും താമസസ്ഥലവും നേരത്തെ എന്‍ഐഎ കണ്ടെത്തിയിരുന്നു.

കേസിലെ മറ്റ് പ്രതികളായ മുഹമ്മദ് അസര്‍, കെ.പി യൂസഫ് എന്നിവരും അബുദാബിയില്‍ ഒളിവില്‍ കഴിയുകയാണെന്ന് വിവരം ലഭിച്ചിട്ടുണ്ട്. ഇവര്‍ക്കെതിരെ നേരത്തേ ലുക്കൗട്ട് നോട്ടീസ് പുറപ്പെടുവിച്ചിരുന്നു.

2006 മാര്‍ച്ച് മൂന്നിനാണ് കോഴിക്കോട് നഗരത്തിലെ കെഎസ്ആര്‍ടിസി ബസ് സ്റ്റാന്‍ഡ് പരിസരത്തും മൊഫ്യുസില്‍ ബസ് സ്റ്റാന്‍ഡിലും സ്‌ഫോടനങ്ങള്‍ നടന്നത്.

രാജ്യാന്തരബന്ധങ്ങളുള്ള ഭീകരര്‍ കോഴിക്കോട് സ്‌ഫോടനത്തിനുപിന്നില്‍ പ്രവര്‍ത്തിച്ചിട്ടുണ്ടെന്നതിന്റെ സൂചനകള്‍ ലഭിച്ചതിന്റെ പശ്ചാത്തലത്തില്‍ ഭീകരപ്രവര്‍ത്തനക്കേസുകള്‍ അന്വേഷിക്കുന്ന എന്‍ഐഎ അന്തര്‍ദേശീയ തലത്തില്‍ കുറ്റവാളികളുടെ നീക്കങ്ങള്‍ നിരീക്ഷിച്ചുവരികയാണ്.