യൂത്ത് കോണ്‍ഗ്രസുകാര്‍ തമ്മില്‍തല്ലി

കൊല്ലം: യൂത്ത് കോണ്‍ഗ്രസിന്റെ സംഘടന ശക്തി തെളിയിക്കുകയെന്ന ലക്ഷ്യത്തോടെ 27 വര്‍ഷത്തിന് ശേഷം നടന്ന യൂത്ത് കോണ്‍ഗ്രസ് സമ്മേളനത്തിനിടെ ഗ്രൂപ്പുകളുടെ കയ്യാങ്കളി. കൊല്ലത്ത് നടന്ന യൂത്ത് കോണ്‍ഗ്രസ് സമ്മേളന റാലിയ്ക്കിടെയാണ് സംഘടനയിലെ ഗ്രൂപ്പുകള്‍ തങ്ങളുടെ കൈക്കരുത്ത് തെളിയിച്ചത്. കൂട്ടത്തല്ലില്‍ ആറ് പേര്‍ക്ക് പരിക്കേറ്റു.

യൂത്ത് കോണ്‍ഗ്രസ് ജില്ലാ സെക്രട്ടറി ബിജു യോഹന്നാന്‍, കൊട്ടാരക്കര ബ്ലോക്ക് പ്രസിഡന്റ് മടത്തിനാപ്പുഴ അജയന്‍, ചടയമംഗലം ബ്ലോക്ക് മുന്‍ പ്രസിഡന്റ് ബദറുദ്ദീന്‍ പുതുവലില്‍, കെഎസ്‌യു ജില്ലാ സെക്രട്ടറി അഭിലാഷ് ചിതറ എന്നിവര്‍ക്കാണ് മര്‍ദനമേറ്റത്.

തലയ്ക്ക് അടിയേറ്റ മടത്തിനാപ്പുഴ അജയന്റെ പരിക്ക് ഗുരുതരമാണ്. ഇവരെ ജില്ലാ ആശുപത്രിയില്‍ പ്രവേശിപ്പിച്ചു.സംഭവം റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകര്‍ക്കു നേരേയും ആക്രമണമുണ്ടായി.

അതേസമയം, സംസ്ഥാന തിരഞ്ഞെടുപ്പുമായി ബന്ധപ്പെട്ടു യൂത്ത് കോണ്‍ഗ്രസില്‍ അഭിപ്രായഭിന്നത രൂക്ഷമായിരിക്കുകയാണ്.