ഓടിക്കൊണ്ടിരുന്ന നാനോയ്ക്ക് തീ പിടിച്ചു

മുംബൈ: ഏറ്റവും വില കുറഞ്ഞ കാറെന്ന പെരുമയുമായി ഇറങ്ങിയ ടാറ്റ മോട്ടോഴ്‌സിന്റെ നാനോ കാറിന് യാത്രയ്ക്കിടെ തീപിടിച്ചു.

മുംബയിലെ മുലുന്ദില്‍ ഞായറാഴ്ചയായിരുന്നു സംഭവം. മുംബയിലെ ഒരു ഇന്‍ഷ്വറന്‍സ് ഏജന്റായ സതീഷ് സാവന്ത് ഞായറാഴ്ചയാണ് നാനോയുടെ ഏറ്റവും പുതിയ മോഡല്‍ സ്വന്തമാക്കിയത്.

കാര്‍ കുടുംബാംഗങ്ങളെ കാണിക്കാനായി മുലുന്ദിലെ എല്‍ഐസി കോളനിയിലേക്ക് ഓടിച്ചുപോകുന്നതിനിടെയാണ് തീപിടിച്ചത്. എസിയും പവര്‍സ്റ്റിയറിംഗുമുള്ള മോഡലിന് 2.4 ലക്ഷം രൂപയാണ് സാവന്ത് മുടക്കിയത്.

വാഹനം ഓടിക്കാന്‍ കഴിയാത്തതിനാല്‍ ഷോറൂം അധികൃതര്‍ സാവന്തിന് ഒരു ഡ്രൈവറെ ഏര്‍പ്പാടാക്കിക്കൊടുത്തിരുന്നു. ഉച്ചയോടെ കാറില്‍ വീട്ടിലേക്ക് പോകവെ കിഴക്കന്‍ എക്‌സ്പ്രസ് ഹൈവേയിലെ നവ്ഗര്‍ സിഗ്‌നല്‍ പോയിന്റിലെത്തിയപ്പോഴാണ് തീപിടിച്ചത്.

പുറകെ വന്ന ഒരു ബൈക്ക് യാത്രക്കാരനാണ് കാര്‍ കത്തുന്ന വിവരം സാവന്തിനെ അറിയിച്ചത്. തിരിഞ്ഞു നോക്കുമ്പോഴേയ്ക്കും കാറിന്റെ പിന്‍ഭാഗം മുഴുവന്‍ തീമൂടിയിരുന്നു.

ഉടന്‍ തന്നെ സാവന്തും, ഡ്രൈവറും കാറില്‍ നിന്ന് പുറത്തേക്ക് ചാടിയതിനാല്‍ ജീവന്‍ രക്ഷപ്പെട്ടു. ഉടന്‍ തന്നെ ഫയര്‍ഫോഴ്‌സ് എത്തി വാഹനത്തിലെ തീ അണച്ചു.