ഗൂഗിള്‍ ചൈനയില്‍ ചാരപ്പണി നടത്തിയെന്ന്

ബെയ്ജിങ്: സെര്‍ച്ച് എന്‍ജീന്‍ ഭീമന്‍ ഗൂഗിള്‍ അമേരിക്കയ്ക്കുവേണ്ടി ചൈനയില്‍ ചാപ്പണി നടത്തിയിരുന്നുവെന്ന് ചൈനീസ് പത്രത്തില്‍ റിപ്പോര്‍ട്ട്.

ചൈനയിലെ കമ്യൂണിസ്റ്റ് പാര്‍ട്ടി പത്രമായ പീപ്പിള്‍സ് ഡെയ്‌ലിയിലാണ് ് ഗൂഗിളിനെതിരെ വാര്‍ത്തവന്നത്. സെന്‍സര്‍ഷിപ്പിനെ തുടര്‍ന്നു ഗൂഗിള്‍ ചൈനയിലെ പ്രവര്‍ത്തനം കഴിഞ്ഞ തിങ്കളാഴ്ച മുതല്‍ നിര്‍ത്തിയത് ഇതുമൂലമാണെന്നും റിപ്പോര്‍ട്ടില്‍ പറയുന്നു.

ഗൂഗിളിനു പകരം തദ്ദേശ സാങ്കേതികവിദ്യയിലൂടെ വികസിപ്പിച്ച പുതിയ സംവിധാനം ഉടന്‍ വരുമെന്നും റിപ്പോര്‍ട്ടില്‍ വ്യക്തമാക്കിയിട്ടുണ്ട്.

ഇതിനിടെ ചൈനയില്‍ നിന്നും പിന്‍വാങ്ങാനുള്ള ഗൂഗിളിന്റെ തീരുമാനം വിദേശ കമ്പനികളുടെ ചൈനയിലെ പ്രവര്‍ത്തനത്തെ ബാധിക്കില്ലെന്നു വിദേശകാര്യ മന്ത്രാലയം വ്യക്തമാക്കി. വിദേശ നിക്ഷേപം സ്വാഗതം ചെയ്യുന്ന രാജ്യത്തിന്റെ നയങ്ങളെ ഇത് ഒരുതരത്തിലും ബാധിക്കില്ല.

ഗൂഗിളിന്റെ പിന്മാറ്റം ചൈനയിലെ ഇന്റര്‍നെറ്റ് ഉപയോക്താക്കളില്‍ ഒരു വിഭാഗത്തെ രോഷാകുലരാക്കിയിട്ടുണ്ട്. എന്നാല്‍ പരോക്ഷമായി നിയന്ത്രണം കൊണ്ടുവരാനുള്ള ചൈനീസ് സര്‍ക്കാരിന്റെ നീക്കം ശരിയല്ലെന്ന് അഭിപ്രായപ്പെടുന്നവരുമുണ്ട്.

ഗൂഗിളിന്റെ പിന്മാറ്റത്തിനു യുഎസ് സര്‍ക്കാരുമായി ബന്ധമൊന്നുമില്ലെന്ന് അസിസ്റ്റന്റ് സെക്രട്ടറി ഓഫ് സ്‌റ്റേറ്റ് പി.ജെ. ക്രൌളി വാഷിങ്ടണില്‍ അറിയിച്ചിട്ടുണ്ട്.