സിപിഎമ്മിന്റെ വാദത്തോട് യോജിപ്പില്ല: ബര്‍ദന്‍

ദില്ലി: ഭരണത്തിലിരിക്കുമ്പോള്‍ ശക്തമായ സമരം നടത്തില്ലെന്ന വാദത്തോട് യോജിപ്പില്ലെന്ന് സിപിഐ ജനറല്‍ സെക്രട്ടറി എ.ബി ബര്‍ദ്ദന്‍.

കേരളമുള്‍പ്പെടെയുള്ള സംസ്ഥാനങ്ങളില്‍ ഭരണത്തിലിരിക്കുമ്പോള്‍ സമരം നടത്തിയ പാരമ്പര്യമുണ്ട്. അതേസമയം ഏപ്രില്‍ എട്ടിന് രാജ്യവ്യാപകമായി നടക്കുന്നത് പിക്കറ്റിംഗ് സമരമാണ്.

പിക്കറ്റിംഗ് നടത്തുന്നവരെ അറസ്റ്റു ചെയ്യണമോ എന്നു തീരുമാനിക്കേണ്ടത് സംസ്ഥാന സര്‍ക്കാറാണ്- അദ്ദേഹം വ്യക്തമാക്കി.

എന്നാല്‍ എല്ലാ സംസ്ഥാനങ്ങളിലും ജയില്‍ നിറയ്ക്കല്‍ സമരം നടത്താന്‍ പ്രയോഗികമായി ബുദ്ധിമുട്ടുണ്ടെന്നും ബര്‍ദന്‍ പറഞ്ഞു.

കേന്ദ്ര സര്‍ക്കാര്‍ നയങ്ങളില്‍ പ്രതിഷേധിച്ച് ഏപ്രില്‍ എട്ടിന് ജയില്‍ നിറയ്ക്കല്‍ സമരം നടത്തണമെന്ന ആശയം ഇടതുകക്ഷികളുടെ പാര്‍ലമെന്റ് മാര്‍ച്ചിനിടെ ആദ്യം കൊണ്ടുവന്നത് ബര്‍ദ്ദനായിരുന്നു.

എന്നാല്‍ ഭരണത്തിലിരിക്കുമ്പോള്‍ പാര്‍ട്ടി പ്രവര്‍ത്തകരെ പോലീസിനെ ഉപയോഗിച്ച അറസ്റ്റു ചെയ്യിക്കാന്‍ കഴിയില്ലെന്ന വ്യാഴാഴ്ച നടന്ന സിപിഎം പി.ബി യോഗത്തില്‍ ബംഗാള്‍ ഘടകം വ്യക്തമാക്കിയിരുന്നു. പി.ബി ഇത് അംഗീകരിക്കുകയും ചെയ്തിരുന്നു.