അഭയ: കോട്ടൂരിന് വിദേശത്ത് പോകാന്‍ അനുമതി

കൊച്ചി: അഭയക്കേസ് ഒന്നാംപ്രതി ഫാദര്‍ തോമസ് കോട്ടൂരിനു വിശുദ്ധനാടുകള്‍ സന്ദര്‍ശിക്കാന്‍ സിബിഐ പ്രത്യേക കോടതി അനുവാദം നല്‍കി. ഇതിനായി ജാമ്യ വ്യവസ്ഥകളില്‍ ഇളവനുവദിച്ചു.

കോടതിയില്‍ സമര്‍പ്പിച്ചിരുന്ന പാസ്‌പോര്‍ട്ട് 90 ദിവസത്തെ കാലാവധി നിശ്ചയിച്ചാണു കോട്ടൂരിനു തിരികെ നല്‍കുന്നത്. വിദേശ സന്ദര്‍ശനം കഴിഞ്ഞ് 90 ദിവസത്തിന് മുമ്പ് മുന്‍പു തിരിച്ചെത്തിയാല്‍ നാട്ടിലെത്തി ഏഴു ദിവസത്തിനകം പാസ്‌പോര്‍ട്ട് കോടതിയില്‍ തിരികെ സമര്‍പ്പിക്കണം.

യാത്രാ ദിവസങ്ങളില്‍ പ്രതി എവിടെയായിരിക്കും ഏതെല്ലാം ഫോണ്‍ നമ്പറുകളില്‍ ബന്ധപ്പെടാന്‍ കഴിയും തുടങ്ങിയ കാര്യങ്ങള്‍ മുന്‍കൂട്ടി സിബിഐയെ അറിയിക്കണമെന്നും പ്രത്യേക കോടതി ജഡ്ജി എസ്. വിജയകുമാര്‍ നിര്‍ദേശിച്ചു.

ഇതിനിടെ മാര്‍ച്ച് 27ന് ശനിയാഴ്ച സിസ്റ്റര്‍ അഭയ കൊല്ലപ്പെട്ടിട്ട് 18 വര്‍ഷം തികയുന്നു.1992 മാര്‍ച്ച് 27 നു കോട്ടയം പയസ് ടെന്‍ത് കോണ്‍വെന്റിലെ കിണറ്റിനുള്ളിലാണ് സിസ്റ്റര്‍ അഭയയുടെ മൃതദേഹം കാണപ്പെട്ടത്.

ആദ്യം ലോക്കല്‍ പൊലീസ് അന്വേഷിച്ച കേസ് ക്രൈംബ്രാഞ്ചിനും പിന്നീടു സിബിഐയ്ക്കും കൈമാറി. സിബിഐ യുടെ വിവിധ സംഘങ്ങള്‍ അന്വേഷിച്ച കേസില്‍ സിബിഐ ഡിവൈഎസ്പി നന്ദകുമാരന്‍ നായരാണ് പ്രതികളെന്ന് സംശയിക്കുന്നവരെ അറസ്റ്റു ചെയ്തത്. കേസ് ഇപ്പോഴും തുടരുകയാണ്.