രാഹുലിന്റെ ശിക്ഷണം തേടി സേവാദള്‍

ദില്ലി: കോണ്‍ഗ്രസ് സേവാദളിന്റെ പ്രവര്‍ത്തനങ്ങളിലും എഐസിസി ജനറല്‍ സെക്രട്ടറി രാഹുല്‍ഗാന്ധിയുടെ ശ്രദ്ധവേണമെന്ന് ആഗ്രഹം. യൂത്ത് കോണ്‍ഗ്രസിനെ അടിമുടി ഉടച്ച് വാര്‍ത്ത് പുതിയ ഊര്‍ജ്ജം പകര്‍ന്ന രാഹുലിന്റെ പ്രവര്‍ത്തനരീതിയാണ് വേസാദളിനെ ആകര്‍ഷിച്ചിരിക്കുന്നതെന്നാണ് സൂചന.

ദില്ലിയില്‍ നടന്ന സേവാദള്‍ ദേശീയ കണ്‍വെന്‍ഷനിലാണ് ഈ ആവശ്യം ഉയര്‍ന്നത്. സേവാദളിന്റെ ചുമതലയുള്ള, എഐസിസി ജനറല്‍ സെക്രട്ടറിയും കേന്ദ്രമന്ത്രിയുമായ മുകുള്‍ വാസ്‌നിക്കാണ് സേവാദള്‍ പ്രവര്‍ത്തനങ്ങള്‍ക്ക് രാഹുല്‍ നേതൃപരമായ പങ്ക് വഹിക്കണമെന്ന് അഭ്യര്‍ഥിച്ചത്.

വേദിയില്‍ സന്നിഹിതയായിരുന്ന സോണിയാഗാന്ധിയോടാണ് മുകുള്‍ വാസ്‌നിക് ഈ അഭ്യര്‍ഥന നടത്തിയത്. തുടര്‍ന്ന് ഉദ്ഘാടന പ്രസംഗം നടത്തിയ സോണിയ ഇക്കാര്യം രാഹുലിനോട് മുകുള്‍ വാസ്‌നിക് തന്നെ പറയണമെന്ന് ആവശ്യപ്പെട്ടു.

സേവാദളിന്റെ പ്രവര്‍ത്തനങ്ങളില്‍ രാഹുല്‍ഗാന്ധി ഭാവിയില്‍ സജീവ താത്പര്യമെടുത്തേക്കുമെന്ന സൂചന കോണ്‍ഗ്രസ് അധ്യക്ഷ സോണിയാഗാന്ധി സമ്മേളനത്തില്‍ നല്‍കിയിട്ടുണ്ട്.

എസ്എസ്‌യുവിന്റെയും യൂത്ത് കോണ്‍ഗ്രസ്സിന്റെയും ചുമതല ഇപ്പോള്‍ രാഹുല്‍ഗാന്ധിയാണ് വഹിക്കുന്നത്. ഇതിനു പുറമേ സേവാദളിന്റെ ചുമതലയും എഐസിസി. ജനറല്‍ സെക്രട്ടറി എന്ന നിലയില്‍ രാഹുല്‍ഗാന്ധി ഏറ്റെടുത്തേക്കുമെന്ന സൂചനുണ്ട്.

വര്‍ഷങ്ങള്‍ക്കുമുമ്പ് കര്‍ണാടകയിലെ ഘട്ട്പ്രഭയില്‍ നടന്ന സേവാദള്‍ ക്യാമ്പിലാണ് രാഹുല്‍ഗാന്ധി രാഷ്ട്രീയത്തില്‍ പ്രവേശിക്കണമെന്ന ആവശ്യം ആദ്യം ഉയര്‍ന്നത്. കോണ്‍ഗ്രസ് പ്രവര്‍ത്തകസമിതി അംഗങ്ങള്‍ ഉള്‍പ്പെടെ മുതിര്‍ന്ന നേതാക്കള്‍ അന്ന്‌സമ്മേളനത്തില്‍ പങ്കെടുത്തു.