ഇംഗ്ലീഷിലും മുന്നില്‍ ഇന്ത്യക്കാര്‍ !!

ലണ്ടന്‍: ബ്രിട്ടനിലെ സ്‌കൂളുകളില്‍ ഇന്ത്യന്‍ വിദ്യാര്‍ഥികള്‍ ബ്രിട്ടിഷുകാരെക്കാള്‍ മികവുകാട്ടുന്നതായി റിപ്പോര്‍ട്ട്. ബ്രിട്ടീഷുകാരുടെ സ്വന്തം ഭാഷയായ ഇംഗ്ലീഷിലും മുന്‍പന്തിയില്‍ നില്‍ക്കുന്നത് ഇന്ത്യക്കാര്‍ തന്നെയാണെന്ന് റിപ്പോര്‍ട്ടില്‍ പറയുന്നു.

ഇന്ത്യക്കാരും ചൈനക്കാരുടെ സെക്കണ്ടറി പരീക്ഷകളില്‍ കൂടുതല്‍ മാര്‍ക്ക് നേടുന്നതായി ബ്രിട്ടനിലെ വിദ്യാഭ്യാസ വകുപ്പുതന്നെയാണ് സ്ഥീരീകരിച്ചിരിക്കുന്നത്.

കഴിഞ്ഞ വര്‍ഷം സെക്കന്‍ഡറി പരീക്ഷയില്‍ എ ഗ്രേഡും ഏറ്റവും മികച്ച പ്രകടനവും നടത്തിയവരില്‍ 31% ഇന്ത്യക്കാരും 55% ചൈനക്കാരുമാണ്. വെറും 16% ബ്രിട്ടിഷുകാര്‍ക്കു മാത്രമേ എ ഗ്രേഡ് നേടാനായുള്ളൂ.

ആഫ്രിക്കക്കാരായ കറുത്ത വര്‍ഗക്കാര്‍ (14%), പാക്കിസ്ഥാന്‍കാര്‍ (13%), കരീബിയക്കാരായ കറുത്തവര്‍ഗക്കാര്‍ (8%) എന്നിങ്ങനെയാണു മറ്റു കണക്കുകള്‍.

ഇംഗ്ലീഷിലെന്ന പോലെ ഗണിതശാസ്ത്രത്തിലും ബ്രിട്ടിഷുകാരെക്കാള്‍ മികവുനേടാന്‍ ചൈനക്കാര്‍ക്കും ഇന്ത്യക്കാര്‍ക്കും കഴിഞ്ഞു.

ഇംഗ്ലിഷ് ഭാഷയിലെ മികവില്‍ ഏറ്റവും മുന്നില്‍ ചൈനക്കാരാണ് (29%), തൊട്ടടുത്ത് ഇന്ത്യക്കാര്‍ (21%), ബ്രിട്ടിഷുകാര്‍ (15%), ആഫ്രിക്കക്കാര്‍ (11%), പാക്കിസ്ഥാന്‍കാര്‍ (9%) എന്നിങ്ങനെയാണ് ഔദ്യോഗിക കണക്ക്.മറ്റു വിഷയങ്ങളിലും സമാനമായ അവസ്ഥ തന്നെയാണ്.