സാനിയ-ഷൊയ്ബ് വിവാഹം നീട്ടിവെച്ചേക്കും?

ഹൈദരാബാദ്: വിവാദത്തില്‍ കുരുങ്ങിയ സാനിയ-ഷൊയ്ബ് വിവാഹം നീട്ടിവെച്ചേക്കുമെന്ന് റിപ്പോര്‍ട്ടുകള്‍. സാനിയ മിര്‍സയുടെ കുടുംബ സുഹൃത്തും ആന്ധ്ര ക്രിക്കറ്റ് അസോസിയേഷന്‍ സെക്രട്ടറിയുമായ വി ചാമുണ്ഡേശ്വര നാഥിനെ ഉദ്ധരിച്ചാണ് ചില മാധ്യമങ്ങള്‍ ഈ വാര്‍ത്ത പുറത്തുവിട്ടിരിക്കുന്നത്.

ഹിന്ദു ദിനപ്പത്രത്തിന് നല്‍കിയ അഭിമുഖത്തില്‍ ചാമുണ്ഡേശ്വര നാഥ് ഇക്കാര്യം വെളിപ്പെടുത്തിയത്. വിവാഹം നീട്ടിവെയ്ക്കാനുള്ള സാധ്യതയെക്കുറിച്ച് സാനിയയുടെ കുടുംബം ആലോചിക്കുന്നുണ്ടെന്ന് അദ്ദേഹം സൂചിപ്പിച്ചു. എന്നാല്‍ ഇക്കാര്യം തീരുമാനിച്ചതായി അറിവില്ലെന്നും അദ്ദേഹം വ്യക്തമാക്കി.

ഏപ്രില്‍ 15 ന് കല്യാണം നടത്താനാണ് ഇരുവരുടെയും കുടുംബങ്ങള്‍ തീരുമാനിച്ചിരുന്നത്. എന്നാല്‍ ഷൊയബിന്റെ മുന്‍ഭാര്യയെന്ന് അവകാശപ്പെട്ട് എത്തിയ അയേഷ സിദ്ധിഖി നല്‍കിയ പരാതിയെ തുടര്‍ന്ന് വിവാദങ്ങള്‍ പൊട്ടിപ്പുറപ്പെടുകയായിരുന്നു.

വിവാഹം നടക്കേണ്ടത് നല്ല അന്തരീക്ഷത്തിലാണെന്നും അതിനാല്‍ ഇപ്പോഴത്തെ വിവാദങ്ങള്‍ ശമിയ്ക്കുന്നതു വരെ കാത്തിരിയ്ക്കാനുമാണ് മിര്‍സ കുടുംബം ആലോചിയ്ക്കുന്നത്.

അതിനിടെ ഷൊയ്ബിന്റെ ബന്ധുക്കള്‍ ചൊവ്വാഴ്ച ഹൈദരാബാദില്‍ എത്തുമെന്ന് റിപ്പോര്‍ട്ടുകളുണ്ട്. പ്രശ്‌നത്തില്‍ പാക് സര്‍ക്കാരും ക്രിക്കറ്റ് ബോര്‍ഡും പൂര്‍ണ പിന്തുണയാണ് മാലിക്കിന് നല്‍കുന്നത്.