സ്വാമിമാര്‍ക്കെതിരെ അശ്ലീല വീഡിയോ ആയുധമാക്കുന്നു

മംഗലാപുരം: ആരെയെങ്കിലും തേജോവധം ചെയ്യാനുണ്ടെങ്കില്‍ എത്രയും പെട്ടെന്ന് അയാളുടെ ചിത്രങ്ങള്‍ ഉള്‍പ്പെടുത്തി അശ്ലീല വീഡിയോ ഉണ്ടാക്കുകയാണെന്നതാണ് ഇപ്പോഴത്തെ ഒരു പതിവുരീതി.

പ്രത്യേകിച്ചും ഹിന്ദു സന്യാസിമാരുടെ കാര്യത്തില്‍ ആളുകള്‍ ഇത്തരമൊരു സമീപനം കൈക്കൊണ്ടുകഴിഞ്ഞുവെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. നിത്യാനന്ദ സ്വാമി ലൈംഗികവിവാദത്തില്‍ കുടുങ്ങിയതിന് പിന്നാലെയാണ് കര്‍ണാടകത്തിലെ മംഗലാപുരത്തുനിന്നും സമാനമായ സംഭവം റിപ്പോര്‍ട്ട് ചെയ്യപ്പെട്ടത്.

രാമചന്ദ്രപൂര്‍ മഠത്തിലെ ശ്രീ രാഘവേശ്വര ഭാരതി സ്വാമിയ്‌ക്കെതിരെയായിരുന്നു ആരോപണം, ഇദ്ദേഹമുള്ള ഒരു അശ്ലീല ടേപ്പ് പ്രചരിക്കാന്‍ തുടങ്ങിയതോടെയാണ് വിവാദങ്ങള്‍ക്ക് തുടക്കമായത്. എന്നാല്‍ ഒരാഴ്ചകഴിയുമ്പോഴേയ്ക്കും ഇതിന്റെ ചിത്രം മാറിമറിയുകയായിരുന്നു.

മംഗലാപുരം പൊലീസ് നടത്തിയ അന്വേഷണത്തിനൊടുവില്‍ സ്വാമിയുടെ പേരില്‍ നിര്‍മ്മിച്ച വീഡിയോ വ്യാജമാണെന്ന് കണ്ടെത്തി. ഇതുമായി ബന്ധപ്പെട്ട് 3പേരെ പൊലീസ് അറസ്റ്റുചെയ്തു. മറ്റ് ഒന്‍പത് പേര്‍ക്കായി ലുക്ക് ഔട്ട് നോട്ടീസ് പുറപ്പെടുവിച്ചിട്ടുണ്ട്.

കേരളത്തിലെ ഒരു ഗസ്റ്റ് ഹൗസില്‍ വച്ച് രാഘവേശ്വര സ്വാമിയുമായി രൂപസാദൃശ്യമുള്ള ഒരാളെ വച്ചാണ് വീഡിയോ ചിത്രീകരിച്ചതെന്ന് പൊലീസ് കണ്ടെത്തിയിട്ടുണ്ട്. രാഘവേശ്വര സ്വാമികള്‍ക്കെതിരെ ആരോപണം ഉയര്‍ന്നപ്പോള്‍ ഹിന്ദു ആത്മീയനേതാക്കളെയും ഹിന്ദുത്വത്തെയും കരിതേച്ചുകാണിക്കാന്‍ ആളുകള്‍ ശ്രമിക്കുകയാണെന്നാരോപിച്ച് വിശ്വാസികള്‍ അദ്ദേഹത്തിന് പിന്നില്‍ ഉറച്ചുനിന്നു.

സ്വാമി നിത്യാനന്ദ സംഭവത്തില്‍ പ്രകടമാകാത്ത ഒരു കാര്യമാണിതെന്നത് ശ്രദ്ധേയമാണ്. പശുവളര്‍ത്തല്‍, പശുസംരക്ഷണം തുടങ്ങിയ ആശയങ്ങള്‍ പ്രചരിപ്പിക്കുന്നതില്‍ പ്രശസ്തനാണ് രാഘവേശ്വര സ്വാമി. ഗോകര്‍ണത്തിലെ മഹാബലേശ്വര ക്ഷേത്രത്തില്‍ ഇദ്ദേഹം ചുമതലയേല്‍ക്കുന്നത് സംബന്ധിച്ച് വന്‍ വിവാദമുണ്ടായിരുന്നു.

സ്വാമി ചുമതലയേറ്റതോടെ ഇവിടത്തെ സാമ്പത്തിക ക്രമക്കേടുകള്‍ പുറത്തുവരുകയും പ്രധാന പൂജാരിയുടെ പണംവെട്ടിപ്പ് നിലയ്ക്കുകയും ചെയ്യുന്നു. ഇതിന് പകരം വീട്ടാന്‍ ലൈംഗികവിവാദത്തില്‍ കുടുക്കി സ്വാമിയുടെ തേജോവധം ചെയ്യാനുള്ള ശ്രമമാകാം നടന്നതെന്നാണ് പൊലീസ് പറയുന്നത്.