ജസ്റ്റീസ് ദിനകരന്‍ സിക്കിമിലേക്ക്

ദില്ലി: ആരോപണവിധേയനായ ജസ്റ്റിസ് ദിനകരനെ സിക്കിം ഹൈക്കോടതിയിലേക്ക് സ്ഥലം മാറ്റി. സുപ്രീം കോടതി കൊളീജിയമാണ് ഈ തീരുമാനമെടുത്തത്.

സര്‍ക്കാര്‍ ഭൂമി അനധികൃതമായി കയ്യേറിയതുള്‍പ്പെടെയുള്ള അഴിമതി ആരോപണങ്ങള്‍ നേരിടുന്ന ദിനകരനോട് അവധിയില്‍ പ്രവേശിയ്ക്കാന്‍ കൊളീജിയം ആവശ്യപ്പെട്ടിരുന്നു. എന്നാല്‍ ജസ്റ്റിസ് ദിനകരന്‍ ഇതിന് തയ്യാറായിരുന്നില്ല.

ജസ്റ്റിസ് ദിനകരന്‍ കോടതിയില്‍ എത്തുന്നുണ്ടായിരുന്നുവെങ്കിലും കേസുകളില്‍ വാദം കേട്ടിരുന്നില്ല. ഇത് കര്‍ണാടക ഹൈക്കോടതിയുടെ പ്രവര്‍ത്തനം അവതാളത്തിലാക്കിയിരുന്നു. ഈ സാഹചര്യത്തിലാണ് നിര്‍ബന്ധിത അവധിയില്‍ പോകാന്‍ കൊളീജിയം ആവശ്യപ്പെട്ടത്.

നിര്‍ബന്ധിത അവധിയില്‍ പ്രവേശിച്ചാലും എപ്പോള്‍ വേണമെങ്കിലും അദ്ദേഹത്തിന് അവധി റദ്ദാക്കി ജോലിയില്‍ തിരിച്ചുകയറാം. ജസ്റ്റിസ് ദിനകരന്‍ മാറി നില്‍ക്കാന്‍ തയാറാകാത്ത സാഹചര്യത്തില്‍ ദില്ലി ഹൈക്കോടതി ആക്ടിങ് ചീഫ് ജസ്റ്റീസിനെ കര്‍ണാടക ഹൈക്കോടതിയിലേക്ക് മാറ്റാനുള്ള കൊളീജിയത്തിന്റെ ശ്രമവും നടന്നിരുന്നില്ല. ഈ സാഹചര്യത്തിലാണ് കേസുകള്‍ താരതമ്യേന കുറവുള്ള സിക്കിം ഹൈക്കോടതിയിലേക്ക് ജസ്റ്റിസ് ദിനകരനെ മാറ്റാന്‍ കൊളീജിയം തീരുമാനിച്ചത്.