ഐപിഎല്‍ വാതുവെയ്പില്‍ തോറ്റു; യുവാവ് ജീവനൊടുക്കി

ഉദഗമണ്ഡലം: ഐപിഎല്‍ വാതുവെയ്പില്‍ പരാജയപെട്ടതിനെ തുടര്‍ന്ന് 32കാരന്‍ തൂങ്ങി മരിച്ചു. ട്രാവല്‍ ഏജന്റ് ആയ സിവി മഹേഷിനെയാണ് കിടപ്പുമുറിയിലെ സീലിംഗ് ഫാനില്‍ തൂങ്ങി മരിച്ച നിലയില്‍ കണ്ടെത്തിയത്.

തിങ്കളാഴ്ച രാത്രി നടന്ന ഡക്കാണ്‍ ചാര്‍ജ്ജേഴ്‌സ്- ബാംഗ്‌ളൂര്‍ റോയല്‍ ചലഞ്ചേഴ്‌സ് മത്‌സരത്തില്‍ ബാംഗ്‌ളൂരിനുവേണ്ടിയാണ് മഹേഷ് രണ്ട് പേരോട് വാതുവെച്ചത്. മത്‌സരത്തില്‍ ബാംഗ്‌ളൂര്‍ പരാജയപെട്ടതിനെ തുടര്‍ന്ന് തനിക്ക് നാല് ലക്ഷം രൂപ നഷ്ടമാവുമെന്ന് സഹോദരനോട് മഹേഷ് പറഞ്ഞിരുന്നു.

വാതുവെയ്പ്പ് മൂലമാണ് സഹോദരന്‍ ജീവനൊടുക്കിയതെന്നും ഊട്ടിയില്‍ അനധികൃതമായി ബെറ്റിങ് ബിസിനസ് നടത്തുന്നവരാണ് ഇതിന് പിന്നിലെന്നും മഹേഷിന്റെ സഹോദരന്‍ രാജ്കുമാര്‍ പറഞ്ഞു.

തുക എത്രയും വേഗം കൊടുത്തില്ലെങ്കില്‍ അതിന്റെ അനന്തരഫലങ്ങള്‍ നേരിടേണ്ടി വരുമെന്ന് ് പറഞ്ഞ് അവര്‍ മഹേഷിനെ ഭീഷണിപെടുത്തിയിരുന്നു എന്ന് രാജ്കുമാര്‍ പോലീസിനു നല്‍കിയ പരാതിയില്‍ പറയുന്നു.