കൊച്ചി ടീമിന്റെ തലപ്പത്ത് അഴിച്ചുപണി
ദില്ലി: കൊച്ചി ഐപിഎല് ടീമിന്റെ തലപ്പത്ത് അഴിച്ചുപണി. ഉടമസ്ഥരായ റോണ്ഡിവൂ കണ്സോര്ഷ്യം ഹര്ഷദ് മേത്തയെ ടീമിന്റെ ചെയര്മാനായി തിരഞ്ഞെടുത്തു.
നിലിവിലെ സിഇഒ ശൈലേന്ദ്ര ഗെയ്ക്ക്വാദിനെ മാറ്റിയാണ് ഹര്ഷദ് മേത്തയെ നിയോഗിച്ചിരിയ്ക്കുന്നത്. കണ്സോര്ഷ്യത്തില് ഏറ്റവും കൂടുതല് ഓഹരിയുള്ള റോസി ബ്യൂ കമ്പനിയുടെ എംഡിയാണ് മേത്ത.
കേരളത്തിലെ സ്വര്ണക്കടകളില് സ്വര്ണവും ഡയമണ്ടും എത്തിക്കുന്ന പ്രധാന കമ്പനികളിലൊന്നാണ് റോസി ബ്യൂ.
ടീമിന്റെ വക്താക്കളിലൊരാളായ സത്യജിത് ഗെയ്ക്കവാദിനെ മാറ്റാനും തീരുമാനമായിട്ടുണ്ട്. ഐപിഎല് വിവാദത്തിലേക്ക് ഗുജറാത്ത് മുഖ്യമന്ത്രി നരേന്ദ്ര മോഡിയെ വലിച്ചിഴച്ചതാണ് സത്യജിത്തിന്റെ സ്ഥാനചലനത്തിനിടയാക്കിയത്. കൊച്ചി ടീമിനെ അഹമ്മദാബാദിലേക്ക് കൊണ്ടുവരാന് നരേന്ദ്ര മോഡിയും രാജസ്ഥാനിലെ ബിജെപി നേതാവായ വസുന്ധര രാജെയും ശ്രമിയ്ക്കുന്നുണ്ടെന്ന് സത്യജിത്ത് കഴിഞ്ഞ ദിവസം ആരോപിച്ചിരുന്നു.