തൊഴിലിനായി 105കാരന്റെ അപേക്ഷ

ജയ്പൂര്‍: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ ജോലിതേടി 105 വയസ്സുകാരന്‍. രാജസ്ഥാനിലെ ഖുണ്ഡി ജില്ലയില്‍ നിന്നാണ് 105 കാരനായ രണ്‍ജിത് ഗുര്‍ജ്ജാര്‍ ജോലിയ്ക്കായി അപേക്ഷ നല്‍കിയത്.

നയന ഗ്രാമപഞ്ചായത്ത് സമിതി മുമ്പാകെയാണ് രണ്‍ജിത്തിന്റെ അപേക്ഷ. മക്കള്‍ ഉപേക്ഷിച്ച് പോയതിനാല്‍ ജീവിക്കാന്‍ തനിക്ക് മറ്റ് വഴികളില്ലെന്ന് കാണിച്ചാണ് രണ്‍ജിത്ത് അപേക്ഷ നല്‍കിയിരിക്കുന്നത്.

എന്നാല്‍, പദ്ധതി നിര്‍ദ്ദേശങ്ങളില്‍ പറയുന്ന നിര്‍ദ്ദിഷ്ട ആരോഗ്യസ്ഥിതിയില്ലാത്തതിനാല്‍ അദ്ദേഹത്തിന് തൊഴില്‍ ലഭിക്കുമോ എന്ന കാര്യം സംശയമാണ്.

പ്രായമേറിയതിനാല്‍ രണ്‍ജിതിന് 100 ദിവസത്തെ തൊഴിലുറപ്പ് പദ്ധതിയില്‍ പങ്കാളിയാവാന്‍ സാധിക്കുമോ എന്ന് അധികൃതര്‍ക്ക് സംശയമുണ്ട്. രണ്‍ജിത് നല്‍കിയ അപേക്ഷയില്‍ എന്ത് തീരുമാനമെടുക്കണമെന്ന് അറിയാതെ പഞ്ചായത്ത് അധികൃതര്‍ കുഴങ്ങുകയാണ്.

ഗ്രാമ പഞ്ചായത്തിന് ലഭിച്ച അപേക്ഷയില്‍ തീരുമാനമെടുക്കാന്‍ ഇപ്പോള്‍ ഉന്നതാധികാരികളുടെ സഹായം വേണമെന്ന അവസ്ഥ വന്നിരിക്കുകയാണ്.

ഗുര്‍ജാറിന് ഇപ്പോള്‍ നടക്കാന്‍ പോലുമുള്ള ശേഷിയില്ലെന്നാണ്് സര്‍പഞ്ച് ഷീര്‍ സിംഗ് ബഞ്ചാര പറയുന്നത്. എന്നാല്‍, മക്കള്‍ ഉപേക്ഷിച്ചു പോയതിനാല്‍ ജീവിക്കുന്നതിന് തൊഴില്‍ അത്യാവശ്യമായി വന്നിരിക്കുകയാണെന്നും സര്‍പഞ്ച് പറയുന്നു.