രാജിവെക്കില്ലെന്ന് ലളിത് മോഡി

ദില്ലി: ശശി തരൂരിന് പിന്നാലെ ഐപിഎല്‍ ചെയര്‍മാന്‍ ലളിത് മോഡിയും പുറത്തേക്കുള്ള വഴിയില്‍. മോഡിയ്‌ക്കെതിരെയുള്ള രാഷ്ട്രീയ നീക്കങ്ങള്‍ ദില്ലിയില്‍ ശക്തമായതും കേന്ദ്ര ഭക്ഷ്യമന്ത്രി ശരദ് പവാര്‍ കൈവിട്ടതും മോഡിയുടെ കമ്മീഷണര്‍ സ്ഥാനം തെറിയ്ക്കുന്നതിന് ഇടയാക്കുമെന്നാണ് കരുതപ്പെടുന്നത്.

അതേസമയം, ദുബയില്‍ നിന്ന് മുംബൈയിലെത്തിയ മോഡി, രാജിവെക്കാന്‍ താന്‍ ഉദ്ദേശിക്കുന്നില്ലെന്ന് മാധ്യമപ്രവര്‍ത്തകരോട് വ്യക്തമാക്കി. സമ്മര്‍ദ്ദങ്ങള്‍ക്ക് വഴങ്ങില്ലെന്ന മോഡിയുടെ ഈ നിലപാട് 26ന് ചേരുന്ന ഐപിഎല്‍ ഭരണസമിതി യോഗത്തില്‍ ഏറ്റുമുട്ടലിന് വഴിയൊരുക്കും.

മന്ത്രിമാരായ പ്രണബ് മുഖര്‍ജിയും പി ചിദംബരവുമായി നടന്ന കൂടിക്കാഴ്ചയ്ക്കുശേഷമാണ് പവാര്‍, മോഡി അനുകൂലനിലപാട് മാറ്റിയത്. മോഡിക്കെതിരെനടത്തുന്ന നീക്കങ്ങള്‍ക്ക് പവാറിന്റെ പിന്തുണ സര്‍ക്കാറിന് അനിവാര്യമായിരുന്നു.

26ന് ചേരുന്ന ഐപിഎല്‍. ഭരണസമിതി യോഗം മോഡിയുടെ കാര്യത്തില്‍ ഐക്യകണേ്ഠ്യന തീരുമാനമെടുക്കുമെന്ന് കൂടിക്കാഴ്ചയ്ക്ക് ശേഷം പവാര്‍ പത്രലേഖകരോട് പറഞ്ഞു.