നളിനി വിളിച്ചത് കാനഡയിലേയ്ക്കും ലണ്ടനിലേയ്ക്കും

ചെന്നൈ: രാജീവ് വധക്കേസില്‍ ജയിലില്‍ കഴിയുന്ന നളിനിയില്‍ നിന്നും പിടിച്ചെടുത്ത മൊബൈല്‍ ഫോണില്‍ നിന്നും കാനഡ, ലണ്ടന്‍ എന്നിവിടങ്ങളിലേയ്ക്ക് കോളുകള്‍ പോയതായി റിപ്പോര്‍ട്ട്. ഏത് നമ്പറിലേയ്ക്കാണ് കോളുകള്‍ പോയതെന്ന കാര്യം വ്യക്തമല്ല.

ചൊവ്വാഴ്ചയാണ് വെല്ലൂര്‍ ജയില്‍ അധികൃതര്‍ നളിനിയില്‍ നിന്നും മൊബൈല്‍ ഫോണ്‍ കണ്ടെടുത്തത്. പത്തൊന്‍പത് വര്‍ഷമായി ജയിലില്‍ കഴിയുന്ന നളിനിയുടെ മകള്‍ മേഘര ലണ്ടനില്‍ പിതാവിന്റെ സഹോദരനൊപ്പമാണ് താമസിക്കുന്നത്.

കുട്ടി ഈ വര്‍ഷം മെഡിക്കല്‍ പഠനം തുടങ്ങാന്‍ പോവുകയാണ്. ലണ്ടനിലേയ്ക്കുള്ള കോള്‍ സ്വാഭാവിമായും ഇവിടേയ്ക്കായിരിക്കുമെന്നുതന്നൊണ് സൂചന.

ജയിലില്‍ മൊബൈല്‍ ഫോണിന് നിരോധനമുള്ള സാഹചര്യത്തിലാണ് നളിനിയുടെ കയ്യില്‍ നിന്നും ഇത് പിടിച്ചെടുത്തത്. ഇതെങ്ങനെ ഇവരുടെ കയ്യിലെത്തിയെന്നത് സംബന്ധിച്ച് വിവരങ്ങളൊന്നുമില്ല. പത്തൊന്‍പത് വര്‍ഷം നീണ്ട ശിക്ഷാ കാലത്ത് നളിനി ജയില്‍ നിയമങ്ങള്‍ ലംഘിച്ചതായി പരാതികളൊന്നും ഉയര്‍ന്നിട്ടില്ല.

നളിനിയ്ക്ക് ആരാണ് ഫോണ്‍ എത്തിച്ചുകൊടുത്തതെന്നത് സംബന്ധിച്ച് കൂടുതല്‍ അന്വേഷണം നടത്തുമെന്ന് അധികൃതര്‍ പറഞ്ഞു. ജയില്‍ ചട്ടങ്ങള്‍ പ്രകാരമുള്ള നടപടി അവര്‍ക്ക് നേരിടേണ്ടിവരും. ജീവപര്യന്തം ശിക്ഷയില്‍ നിന്നും മോചനം ലഭിക്കാനായി നളിനി നടത്തുന്ന നീക്കങ്ങള്‍ക്ക് പുതിയ സംഭവം തിരിച്ചടിയാകും.

ചില സൂചനകള്‍ ലഭിച്ചതിനെത്തുടര്‍ന്ന് മൂന്നു ദിവസത്തിലേറെയായി നളിനിയെ നിരീക്ഷിച്ചുവരുകയായിരുന്നുവെന്നും ചൊവ്വാഴ്ച ജയില്‍ മുറിയില്‍ നടത്തിയ പരിശോധനയിലാണ് തുണി സഞ്ചിയില്‍ നിന്നും ഫോണ്‍ കണ്ടെടുത്തതെന്നും ജയില്‍ എഡിജിപി പറഞ്ഞു. കണ്ടെടുക്കുമ്പോള്‍ മൊബൈല്‍ ഫോണ്‍ സ്വിച്ച് ഓണ്‍ ചെയ്ത നിലയിലായിരുന്നു.