സോറനുള്ള പിന്തുണ ബിജെപി പിന്‍വലിച്ചു

ദില്ലി: ജാര്‍ഖണ്ഡിലെ ഷിബു സോറന്‍ മന്ത്രിസഭയ്ക്കുള്ള പിന്തുണ ബി.ജെ.പി പിന്‍വലിച്ചു. പ്രതിപക്ഷം കൊണ്ടുവന്ന ഖണ്ഡന പ്രമേയത്തില്‍ സോറന്‍ യുപിഎ സര്‍ക്കാരിന് അനുകൂലമായി വോട്ടുചെയ്തിരുന്നു. ഇതേ തുടര്‍ന്നാണ് ബിജെപി പാര്‍ലമെന്ററി ബോര്‍ഡ് യോഗം സര്‍ക്കാരിനുള്ള പിന്തുണ പിന്‍വലിക്കാന്‍ തീരുമാനിച്ചത്. ജാര്‍ഖണ്ഡിലെ എല്ലാ ബി.ജെ.പി മന്ത്രിമാരും ഉടന്‍ രാജിവെക്കും. ബിജെപി എംഎല്‍എ മാര്‍ ഇന്നുതന്നെ ഗവര്‍ണറെക്കാണുമെന്നും പാര്‍ട്ടി നേതൃത്വം അറിയിച്ചു.

ഖണ്ഡന പ്രമേയം വോട്ടിനിട്ടപ്പോള്‍ സാറന്‍ യുപി.എ സര്‍ക്കാരിന് അനുകൂലമായി വോട്ടുചെയ്തിരുന്നു. പിഴവുമൂലമാണ് ഇതെന്നായിരുന്നു ബിജെപി നേതൃത്വം ആദ്യം കരുതിയത്. എന്നാല്‍ പിന്നീട് സ്ലിപ്പ് വോട്ടിങ് നടന്നപ്പോഴും സോറന്‍ വോട്ട് മറിച്ചു.

എതിരില്ലാതെയാണ് തീരുമാനം എടുത്തതെന്ന് ബിജെപി ജനറല്‍ സെക്രട്ടറി അനന്ത് കുമാര്‍ പറഞ്ഞു. ബി.ജെ.പി പാര്‍ലമെന്ററി പാര്‍ട്ടി ചെയര്‍മാന്‍ എല്‍.കെ.അദ്വാനി, ഇരുസഭകളിലെയും നേതാക്കളായ അരുണ്‍ ജെയ്റ്റ്‌ലി, സുഷമ സ്വരാജ് എന്നിവര്‍ ഇതിന് അംഗീകാരം നല്‍കിയതായി അദ്ദേഹം കൂട്ടിച്ചേര്‍ത്തു.

ഖണ്ഡന പ്രമേയത്തിന്മേലുള്ള വോട്ടെടുപ്പിനുശേഷം സോറന്‍ ബി.ജെ.പി അധ്യക്ഷന്‍ നിതിന്‍ ഗഡ്കരിയുമായി കൂടിക്കാഴ്ച നടത്തിയിരുന്നു. ഇതിനുശേഷമാണ് ഗഡ്കരി പാര്‍ലമെന്ററി ബോര്‍ഡ് യോഗം വിളിച്ചു ചേര്‍ത്തത്.

81 അംഗ ജാര്‍ഖണ്ഡ് അസംബ്ലിയില്‍ ജെ.എം.എമ്മിനും ബിജെപിയ്ക്കും 18 അംഗങ്ങള്‍ വീതമുണ്ട്. കോണ്‍ഗ്രസിന് 14 ഉം ജാര്‍ഖണ്ഡ് വികാസ് മോര്‍ച്ചയ്ക്ക് 11 ഉം അംഗങ്ങളുണ്ട്.