സര്‍ക്കാരിനെ പിന്തുണച്ചത് അബദ്ധം: സോറന്‍

ദില്ലി: ലോക്‌സഭയില്‍ യുപിഎ സര്‍ക്കാറിനെതിരെ പ്രതിപക്ഷം കൊണ്ടുവന്ന ഖണ്ഡന പ്രമേയത്തെ എതിര്‍ത്ത് വോട്ടു ചെയ്തത് അബദ്ധത്തിലാണെന്ന് ജാര്‍ഖണ്ഡ് മുക്തി മോര്‍ച്ച. വോട്ടിങ്ങിനിടെയുണ്ടായ ആശയക്കുഴപ്പത്തിനിടെ ഷിബു സോറന് സംഭവിച്ച ഒരു കൈയബദ്ധമാണതെന്ന് ജെ എംഎം എംപിയും ഷിബു സോറന്റെ മകനുമായ ഹേമന്ദ് സോറന്‍ പറഞ്ഞു.

ഇത് സംബന്ധിച്ച് ബി ജെ പി പ്രസിഡന്റ് നിതിന്‍ ഗഡ്കരിയെ കണ്ട് കാര്യങ്ങള്‍ വിശദീകരിച്ചുവെന്നും ഹേമന്ദ് സോറന്‍ വ്യക്തമാക്കി. ബിജെപി പിന്തുണയോടെ ജാര്‍ഖണ്ഡ് മുഖ്യമന്ത്രിയായ ഷിബു സോറന്‍ അദ്ദേഹത്തിന്റെ എം.പി. സ്ഥാനം രാജിവെച്ചിട്ടില്ല. ഖണ്ഡന പ്രമേയത്തിന്മേലുള്ള വോട്ടെടുപ്പില്‍ പങ്കെടുക്കാനായി സോറന്‍ ദില്ലിയിലെത്തുകയായിരുന്നു. എന്നാല്‍ സോറന്‍ സര്‍ക്കാരിന് അനുകൂലമായി വോട്ട് രേഖപ്പെടുത്തിയത് പ്രതിപക്ഷത്തെ അമ്പരിപ്പിച്ചിരുന്നു.

ഖണ്ഡനോപക്ഷേപത്തെ എതിര്‍ത്ത് വോട്ടു ചെയ്ത ഷിബു സോറന്‍ സര്‍ക്കാരിനുള്ള പിന്തുണ ബിജെപി പിന്‍വലിക്കുമെന്നാണ് അറിയുന്നത്.

സോറന്റെ നടപടിയെ ഗൗരവമായി കാണുന്നു. സഖ്യ മര്യാദ ലംഘിച്ചു വോട്ട് ചെയ്ത സോറന്‍ ഗുരുതരമായ പ്രത്യഘാതം നേരിടേണ്ടിവരുമെന്നും ബിജെപി വ്യക്തമാക്കി.