കോണ്‍ഗ്രസില്‍ ഗ്രൂപ്പ് കളിയ്ക്ക് വിലക്ക്

തിരുവനന്തപുരം: കോണ്‍ഗ്രസില്‍ ഗ്രൂപ്പ് യോഗങ്ങള്‍ക്കും പരസ്യപ്രസ്താവനകള്‍ക്കും കെപിസിസി വിലക്കേര്‍പ്പെടുത്തി.

സംഘടനാതിരഞ്ഞെടുപ്പ് സമവായത്തിലൂടെ നടത്താന്‍ കെപിസിസിയോഗം തീരുമാനിച്ചിട്ടുണ്ട്. ഇതിനായി ജില്ല, ബ്ലോക്ക് തലങ്ങളില്‍ സമിതിയെ രൂപികരിക്കും.

കെപിസിസി നേതൃയോഗത്തിന്റെ തീരുമാനങ്ങള്‍ കെ.എം മാണിയെ അറിയിക്കാന്‍ പ്രതിപക്ഷ നേതാവ് ഉമ്മന്‍ ചാണ്ടിയെ യോഗം ചുമതലപ്പെടുത്തി.

കോണ്‍ഗ്രസ്, യൂത്ത് കോണ്‍ഗ്രസ് തിരഞ്ഞെടുപ്പുകള്‍ പ്രഖ്യാപിച്ചതിന് പിന്നാലെ കോണ്‍ഗ്രസില്‍ ഗ്രൂപ്പ് നീക്കങ്ങള്‍ ശക്തമായിരുന്നു. ചെന്നിത്തല, വയലാര്‍ രവി എന്നിവര്‍ നേതൃത്വം നല്‍കുന്ന വിശാല ഐഗ്രൂപ്പിന്റെ പ്രവര്‍ത്തനമാണ് ഇതില്‍ ഏറ്റവും ശക്തം.

ഇതിനിടെ ഉമ്മന്‍ചാണ്ടി കെ കരുണാകരനെ കണ്ട് എ വിഭാഗത്തിന്റെ സ്ഥാനാര്‍ത്ഥിയെ പിന്തുണയ്ക്കാന്‍ ആവശ്യപ്പെട്ടിരുന്നു. ഇതിന് പിന്നാലെ കേന്ദ്രമന്ത്രി കെവി തോമസിന്റെ നേതൃത്വത്തില്‍ മറ്റൊരു ഗ്രൂപ്പും സജീവമായിരുന്നു.

ഗ്രൂപ്പ ്‌നീക്കങ്ങള്‍ പാര്‍ട്ടിയെ ക്ഷയിപ്പിക്കുമെന്ന് പറഞ്ഞ് കേന്ദ്രമന്ത്രി എകെ ആന്റണി രംഗത്തെത്തിയിരുന്നു. ഹൈക്കമാന്റ് ഗ്രൂപ്പുകളിയ്ക്ക് പൂര്‍ണമായും വിലക്കേര്‍പ്പെടുത്തിയിരുന്നില്ലെങ്കിലും ഇത് പ്രശ്‌നങ്ങള്‍ ചെന്നെത്തരുതെന്ന് നിര്‍ദ്ദേശം നല്‍കിയിരുന്നു.