ടൈം പട്ടികയില്‍ സച്ചിനും മന്‍മോഹനും

ന്യൂയോര്‍ക്ക്: അമേരിക്കയിലെ ടൈം മാഗസിന്‍ തിരഞ്ഞെടുത്ത ഏറ്റവും സ്വാധീനശേഷിയുള്ള 100 പേരുടെ പട്ടികയില്‍ പ്രധാനമന്ത്രി മന്‍മോഹന്‍ സിങും ക്രിക്കറ്റ് താരം സച്ചിനും ഇടം നേടി. ഇവരടക്കം പട്ടികയില്‍ ഒമ്പത് ഇന്ത്യക്കാരാണ് സ്ഥാനം കണ്ടെത്തിയിരിക്കുന്നത്.

എഴുത്തുകാരന്‍ ചേതന്‍ ഭഗവത്, ബയോകോണ്‍ എംഡി കിരണ്‍ മജുംദാര്‍, നേത്രരോഗ വിദഗ്ദന്‍ പെരുമാള്‍സ്വാമി നാംപെരുമാള്‍ സ്വാമി, സാമൂഹിക പ്രവര്‍ത്തകന്‍ സന്‍ജിത് ബുക്കര്‍ റോയ്, ഹാര്‍വാര്‍ഡ് യൂണിവേഴ്‌സിറ്റി പ്രൊഫസറായ അതുല്‍ ഗ്വാണ്ടെ, കിരണ്‍ മസൂംദാര്‍ ഷാ, രാഹുല്‍ സിങ് എന്നിവരാണ് മറ്റുള്ളവര്‍.

ബ്രസീല്‍ നേതാവ് ലൂയിസ് ഇന്‍കാഷിയോ ലുലാ ഡാ സില്‍വയാണ് പട്ടികയില്‍ ഒന്നാമത്. യുഎസ് പ്രസിഡന്റ് ബരാക് ഒബാമയ്ക്ക് നാലാം സ്ഥാനം മാത്രമേയുള്ളൂ. പട്ടികയില്‍ പത്തൊമ്പതാം സ്ഥാനത്ത് നില്‍ക്കുന്ന മന്‍മോഹന്‍ സിങിന്റെ സാമ്പത്തിക നയങ്ങളെ മാഗസിന്‍ പ്രത്യേകം പരാമര്‍ശിച്ചിട്ടുണ്ട്.

പട്ടികയില്‍ ആറാമതുള്ള പെരുമാള്‍സ്വാമി നമ്പെരുമാള്‍സ്വാമി സ്വാധീന ശേഷിയില്‍ സച്ചിന്‍ ടെന്‍ഡുല്‍ക്കറെയും കടത്തിവെട്ടിയിട്ടുണ്ട്. നേത്രരോഗ വിദഗ്ധനായ പെരുമാള്‍സ്വാമി അരവിന്ദ് കണ്ണാശുപത്രിയില്‍ 1976 മുതല്‍ 36 ലക്ഷം കാറ്ററാക്ട് ശസ്ത്രക്രിയ നടത്തിയതാണ് അദ്ദേഹത്തിനു പട്ടികയില്‍ ഇടം നല്‍കിയത്. സച്ചിന്‍ ഈ വിഭാഗത്തില്‍ പതിമൂന്നാം സ്ഥാനത്താണ്.

പ്രശസ്ത അമേരിക്കന്‍ സംഗീത നൃത്ത പ്രതിഭ ലേഡി ഗാഗ, മുന്‍ അമേരിക്കന്‍ പ്രസിഡന്റ് ബില്‍ ക്ലിന്റണ്‍, അമേരിക്കന്‍ സൈനിക മേധവി മൈക്ക് മുള്ളന്‍, ഇറാന്‍ തിരഞ്ഞെടുപ്പില്‍ അഹമ്മദി നെജാദിനോട് തോറ്റ പ്രതിപക്ഷനേതാവ് മിര്‍ ഹുസൈന്‍ മൂസാവി തുടങ്ങിയവര്‍ പട്ടികയില്‍ ഇടം കണ്ടെത്തിയിട്ടുണ്ട്.