വിഭാഗീയത ഉലച്ചിലുണ്ടാക്കി: സിപിഎം രേഖ

തിരുവനന്തപുരം: മുഖ്യമന്ത്രിയടക്കമുള്ള സിപിഎം മന്ത്രിമാരുടെ പ്രവര്‍ത്തനത്തില്‍ പോരായ്മകളുണ്ടെന്നും ലെനിനിസ്റ്റ് സംഘടനാ തത്വങ്ങളും കമ്യൂണിസ്റ്റ് മൂല്യങ്ങളും പാലിക്കുന്നതില്‍ സംസ്ഥാനഘടത്തില്‍ പാളിച്ചകളുണ്ടെന്നും പാര്‍ട്ടി രേഖ.

സിപിഎം സംസ്ഥാന നേതൃത്വത്തിന്റെ തെറ്റുതിരുത്തല്‍ പ്രക്രിയയ്ക്കു തുടക്കമിട്ടു സെക്രട്ടറി പിണറായി വിജയന്‍ വച്ച രേഖയിലാണ് ഈ കുറ്റമേല്‍ക്കല്‍.

മന്ത്രിമാരുടെയും അവരുടെ ഓഫീസുകളുടെയും പ്രവര്‍ത്തനത്തില്‍ പാര്‍ട്ടിയ്ക്കു തൃപ്തിയില്ല. പ്രാഗത്ഭ്യമുള്ളവരാണു മന്ത്രിമാരെങ്കിലും കൂട്ടായി പ്രവര്‍ത്തിച്ച് അതു തെളിയിക്കാന്‍ കഴിഞ്ഞില്ലെന്ന് രേഖയില്‍ ചൂണ്ടിക്കാട്ടുന്നു.

ലെനിനിസ്റ്റ് സംഘടനാ തത്വങ്ങളും കമ്യൂണിസ്റ്റ് മൂല്യങ്ങളും പാലിക്കുന്നതില്‍ സിപിഎം സംസ്ഥാന ഘടകത്തില്‍ പാളിച്ചകളുണ്ടായിട്ടുണ്ടെന്നു സംസ്ഥാന സെക്രട്ടേറിയറ്റില്‍ പാര്‍ട്ടിയുടെ സ്വയംവിമര്‍ശനം. നേതൃതലത്തിലുള്ളവര്‍ക്കും ഇക്കാര്യങ്ങളില്‍ കാര്യമായ വീഴ്ചയുണ്ടായി എന്നാണ് രേഖയില്‍ പറയുന്നത്.

വിഭാഗീയത നേതൃനിരയിലെ അംഗങ്ങളുടെ പ്രവര്‍ത്തനത്തെ ബാധിച്ചിട്ടുണ്ട്. വിഭാഗീയത പരിഹരിക്കാനുള്ള ശ്രമങ്ങള്‍ വിജയംകണ്ടെങ്കിലും അതുണ്ടാക്കിവച്ച ക്ഷീണം ചെറിയതെല്ലന്ന ധ്വനിയാണു രേഖ നല്‍കുന്നത്.

പാര്‍ലമെന്ററിസ്ഥാനമോഹങ്ങളും പാര്‍ട്ടിയിലെ ഔദ്യോഗിക സ്ഥാനങ്ങള്‍ കയ്യടക്കാനുള്ള പോരാട്ടവുമാണു വിഭാഗീയതയുടെ മൂലകാരണം എന്ന സ്വയംവിമര്‍ശനവും സെക്രട്ടേറിയറ്റിലുണ്ടായി. എല്ലാ തെറ്റായ പ്രവണതകളും തഴച്ചുവളരാനുള്ള അന്തരീക്ഷം വിഭാഗീയത സൃഷ്ടിച്ചുവെന്ന് രേഖ വിലയിരുത്തുന്നു.

96ല്‍ തുടങ്ങിവച്ച തെറ്റുതിരുത്തല്‍ പ്രക്രിയ പാളിപ്പോയതിനു പ്രധാന കാരണവും വിഭാഗീയതയാണെന്നു രേഖയില്‍ പറയുന്നുണ്ട്. പൊതു വിമര്‍ശനത്തിനോടു പ്രതികരിച്ചും അല്ലാതെയും ഓരോ അംഗവും നിലപാടു വ്യക്തമാക്കിയാണു രേഖ ക്രോഡീകരിക്കുക.

സെക്രട്ടേറിയറ്റിലെ ചര്‍ച്ച പൂര്‍ത്തിയാക്കി ചൊവ്വാഴ്ച സംസ്ഥാന കമ്മിറ്റിയില്‍ ഇത് അവതരിപ്പിക്കും. ജനറല്‍ സെക്രട്ടറി പ്രകാശ് കാരാട്ടിന്റെ സാന്നിധ്യത്തിലാണു യോഗം നടക്കുന്നത്.