വ്യാജ സത്യവാങ്മൂലം: ജയകുമാറിന് നോട്ടീസ്

ദില്ലി: അഡീഷണല്‍ ചീഫ് സെക്രട്ടറി കെ ജയകുമാറും, സംസ്ഥാന സര്‍ക്കാര്‍ ലോ ഓഫീസര്‍ ബിആര്‍ മോഹന്‍ കുമാറും വ്യാജ സത്യവാങ്മൂലം സമര്‍പ്പിച്ചെന്ന് കേസ്.

ജലസേചന വകുപ്പില്‍ സൂപ്രണ്ടിങ് എന്‍ജിനീയറായ വികെ മഹാനുദേവന്റെ സ്ഥാനക്കയറ്റവുമായി ബന്ധപ്പെട്ട് വ്യാജ സത്യവാങ്മൂലം സമര്‍പ്പിച്ചുവെന്നാണ് കേസ്.

ഇവര്‍ രണ്ടുപേര്‍ക്കുമെതിരെ ക്രിമിനല്‍ കേസ് എടുക്കാതിരിക്കാന്‍ കാരണം കാണിയ്ക്കണമെന്നാവശ്യപ്പെട്ട് സുപ്രീംകോടതി നോട്ടീസ്. ജസ്റ്റിസ് അല്‍ത്തമീസ് കബീറിന്റെ ബഞ്ചാണ് ചൊവ്വാഴ്ച ഹര്‍ജി പരിഗണിച്ചത്.

പട്ടികജാതി തണ്ടാന്‍ സമുദായത്തില്‍ പെടുന്ന മഹാനുദേവന്റെ ജാതിസര്‍ട്ടിഫിക്കറ്റുമായി ബന്ധപ്പെട്ട പ്രശ്‌നത്തില്‍ നിന്നാണ് കേസിന്റെ തുടക്കം. പാലക്കാട് ജില്ലയിലെ തണ്ടാന്‍ എന്നത് സ്ഥാനപ്പേരാണെന്ന സര്‍ക്കാറിന്റെ നിലപാട് സുപ്രീം കോടതി 1994ല്‍ തള്ളിയിരുന്നു.

അതിനുശേഷം രണ്ടു ഹര്‍ജികളിലായി അദ്ദേഹത്തിന്റെ ജാതി കോടതി അംഗീകരിച്ചു. 2003 ല്‍ ജാതി തെളിയിക്കാന്‍ സംസ്ഥാന സര്‍ക്കാര്‍ വീണ്ടും ആവശ്യപ്പെട്ടു. എന്നാല്‍ ഹൈക്കോടതി അത് അംഗീകരിച്ചില്ല. 2006ല്‍ സര്‍ക്കാരിന്റെ നിലപാട് കോടതി തള്ളി.

അതിനെതിരെ സര്‍ക്കാര്‍ നല്‍കിയ അപ്പീല്‍ സുപ്രീംകോടതിയുടെ പരിഗണനയിലിരിക്കേ ജലസേചന വകുപ്പില്‍ രണ്ടു ചീഫ് എന്‍ജിനീയര്‍മാരുടെ ഒഴിവുവന്നു. സിവില്‍ അപ്പീല്‍ പരിഗണനയിലായതിനാല്‍ സ്ഥാനക്കയറ്റത്തിന് തന്നെ പരിഗണിക്കണമെന്നാവശ്യപ്പെട്ട് മഹാനുദേവന്‍ കോടതി നിര്‍ദേശത്തിനായി ഹര്‍ജി സമര്‍പ്പിച്ചു. ഈ ഹര്‍ജിക്കുള്ള മറുപടിയിലാണ് സര്‍ക്കാര്‍ വ്യാജ സത്യവാങ്മൂലം നല്‍കിയത്.

ചീഫ് എന്‍ജിനീയറുടേത് സെലക്ഷന്‍ പദവിയാണെന്നും മഹാനുദേവനെ പരിഗണിച്ചിരുന്നുവെന്നുമാണ് സര്‍ക്കാര്‍ സുപ്രീംകോടതിയില്‍ ബോധിപ്പിച്ചത്. അതിന്റെ അടിസ്ഥാനത്തില്‍ കോടതി കേസ് തള്ളി.

തുടര്‍ന്ന് മഹാനുദേവന്‍ ഹൈക്കോടതിയെ സമീപിക്കുകയും കോടതി രണ്ട് ചീഫ് എന്‍ജിനീയര്‍മാരുടെ സ്ഥാനക്കയറ്റം അസാധുവാക്കുകയും രണ്ടു മാസത്തിനുള്ളില്‍ പുതിയ നിയമനം നടത്താന്‍ ഉത്തരവിടുകയും ചെയ്തു.

കഴിഞ്ഞകൊല്ലം ഡിസംബറിലായിരുന്നു അത്. അതിനിടെ, വിവരാവകാശ നിയമപ്രകാരം ലഭിച്ച മന്ത്രിസഭാ യോഗരേഖകളില്‍ നിന്നാണ് പഴയ സത്യവാങ്മൂലം വ്യാജമാണെന്ന് തെളിഞ്ഞത്.