ഡേവിഡ് കാമറോണ്‍ ബ്രിട്ടീഷ് പ്രധാനമന്ത്രി

ലണ്ടന്‍: കണ്‍സര്‍വേറ്റീവ് പാര്‍ട്ടി നേതാവ് ഡേവിഡ് കാമറോണ്‍ ബ്രിട്ടന്റെ പുതിയ പ്രധാനമന്ത്രിയാകും. ലിബറല്‍ ഡമോക്രാറ്റിക് പാര്‍ട്ടിയുടെ പിന്തുണയോടെയാണ് കാമറോണ്‍ പ്രധാനമന്ത്രിപദത്തിലെത്തുന്നത്.

തിരഞ്ഞെടുപ്പില്‍ ആര്‍ക്കും ഭൂരിപക്ഷം ലഭിക്കാത്തതിനെ തുടര്‍ന്ന് ദിവസങ്ങള്‍ നീണ്ട ചര്‍ച്ചകള്‍ക്കൊടുവിലാണ് കണ്‍സര്‍വേറ്റീവ് പാര്‍ട്ടിയും ലിബറല്‍ ഡെമോക്രാറ്റുകളുമായി സഖ്യത്തിലെത്താന്‍ ധാരണയായത്.
ലിബറല്‍ ഡമോക്രാറ്റിക് പാര്‍ട്ടിയുമായി സമ്പൂര്‍ണ സഖ്യമാണ് താന്‍ ഉദ്ദേശിക്കുന്നതെന്ന് കാമറോണ്‍ പറഞ്ഞു. 13 വര്‍ഷത്തെ ഭരണത്തിനുശേഷമാണ് ലേബര്‍ പാര്‍ട്ടി അധികാരമൊഴിയുന്നത്.

ഇതിന് മുന്നോട്ടിയായി നിലവിലെ പ്രധാനമന്ത്രി ഗോര്‍ഡന്‍ ബ്രൗണ്‍ രാജിവെച്ചു. ചൊവ്വാഴ്ച വൈകിട്ട് ബക്കിങ്ഹാം കൊട്ടാരത്തിലെത്തിയാണ് ലേബര്‍ പാര്‍ട്ടി നേതാവായ ബ്രൗണ്‍ പ്രധാനമന്ത്രി സ്ഥാനം രാജിവെച്ചുകൊണ്ടുള്ള കത്ത് കൈമാറിയത്. ഡേവിഡ് കാമറോണ്‍ പിന്‍ഗാമിയാകുമെന്ന് അദ്ദേഹം പ്രഖ്യാപിച്ചു.

തുടര്‍ന്ന് കാമറോണും ബക്കിങ്ഹാം കൊട്ടാരത്തിലെത്തി പ്രധാനമന്ത്രിയാകാനുള്ള അവകാശം ഉന്നയിച്ചു. ലിബറല്‍ ഡെമോക്രാറ്റുകളുമായി ചേര്‍ന്ന് സുസ്ഥിര സര്‍ക്കാര്‍ ഉണ്ടാക്കുമെന്ന് അദ്ദേഹം പ്രഖ്യാപിച്ചു.

കാമറോണിനെ പുതിയ പ്രധാനമന്ത്രിയായി ബ്രിട്ടീഷ് രാജ്ഞി നാമനിര്‍ദേശം ചെയ്തതായി ഔദ്യോഗിക കേന്ദ്രങ്ങള്‍ അറിയിച്ചു. കഴിഞ്ഞയാഴ്ച നടന്ന തിരഞ്ഞെടുപ്പില്‍ കണ്‍സര്‍വേറ്റീവ് പാര്‍ട്ടിയാണ് കൂടുതല്‍ സീറ്റ് നേടിയത്. എന്നാല്‍ കേവല ഭൂരിപക്ഷം ഉറപ്പാക്കാനായില്ല.

കണ്‍സര്‍വേറ്റീവ് - 306, ലേബര്‍ - 258, ലിബറല്‍ ഡമോക്രാറ്റ് - 57 എന്നിങ്ങനെയാണ് പാര്‍ലമെന്റിലെ കക്ഷിനില. കേവല ഭൂരിപക്ഷത്തിനു 326 അംഗങ്ങളാണു വേണ്ടത്. ചെറിയ പാര്‍ട്ടി അംഗങ്ങളും സ്വതന്ത്രരുമായി 28 പേരും തിരഞ്ഞെടുക്കപ്പെട്ടിട്ടുണ്ട്.